Pletihan sa bus mosaka sa Pebrero 1

Sugod sa Pebrero 1, mahimo nang P6 ang pletihan sa bus ug mini bus sa unang lima ka kilometros ug dugang P1.20 sa mosunod nga kilometro.

Samtang, karong Biyernes iduso na sa Cebu Integrated Transport Cooperative (Citrasco) sa Land Transportation Franchising and Regulatory Board (LTFRB) ang petition nga mangayo og P5.50 nga umento sa minimum nga pletihan sa public utility jeepney.

Atol sa tigom sa mga bus ug

minibus operators kagahapon, nauyonan nga ipatuman na ang insaktong pletihan nga giaprobahan sa LTFRB gumikan kay ningsaka na ang presyo sa mga produktong petrulyo ug mga palaliton.

Sa kasamtangan, P5 ang pletihan sa bus ug minibus sa unang lima ka kilometros ug dugang P1 sa mosunod nga kilometro.

Pananglitan, P40 ang pletihan karon gikan sa siyudad sa Sugbo hangtod sa Carcar City nga 40 kilometros ang gilay-on, inig Pebrero 1 mahimo na kining P48.

Si Julito Flores, presidente sa Cebu Provincial Bus and Minibus Operators Cooperative, nipasabot nga sud na sa pipila ka mga tuig nga sila nag-undercharge sa pletihan dinhi sa Sugbo.

“Sa mata sa gobiyerno, undercharge ta, illegal ta. Pero sa matag sa pasahero, legal ta,” pahayag niini.

Si Ahmed Cuizon, director sa LTFRB 7, niingon nga dili na mahinungdanon ang legal nga dokumento alang sa pagpa-terminate sa memorandum of agreement tali sa mga bus ug

minibus operators ug kagamhanan sa lalawigan sa Sugbo.

Ang importante, matod niya, pormal nga mapahibawo si Gobernador Hilario Davide III sa tinguha sa mga bus ug minibus operators nga makolekta

ang insaktong pletihan.

“Aron sa ingon nga di pud malain ang gobernador nga mananghid sila, not necessarily legal document. Ang akoa

lang out of courtesy, mapahibawo gyud nila ang governor,” dugang pagpasabot ni Cuizon.

Sa samang tigom, sumala ni Atty. Jojo Villa, nagrepresentar sa Provincial Legal Office, nga gikinahanglan ang legal nga dokumento aron mapaway bili ang MOA.

Apan si Reynaldo Elnar, Transportation Development Officer sa LTFRB 7, nga maoy acting

director dihang gipirmahan ang MOA, nipasabot nga dili legal ang MOA kay wa maaprobahi sa ilang ulohan nga buhatan.