LPA nahilis ra: Pagasa
Nahilis na ang low pressure area nga nasigpatan sa Philippine Atmospheric, Geophysical and Astronomical Services Administration sa sidlakan sa Mindanao.
Apan ang hinungaw niini nga niabot sa tibuok Kabisay-an, ang hinungdan sa nasinati nga kasarangan ngadto sa makusog nga pag-ulan sa Sugbo nga hinungdan sa pagbaha sa pipila ka dapit sa Sugbo.
Dunay pipila ka dapit sa Dakbayan sa Lapu – Lapu ug Mandaue nga gibahaan.
Gitutokan sa matag City Disaster Risk Reduction Management Office sa duha ka dakbayan ang mga flood prone area sa ilang tagsa-tagsa ka mga dapit.
Niining pagsuwat, ang dalan sa Sityo Langob, Barangay Poblacion; Sityo Humay- Humay, sa barangay Gun-ob, Lapu-Lapu ang nasanapan nga maoy naandan bisan sa regular nga uwan gumikan kay lawom ang maong karsada.
Si Andy Berame, CDRRMO sa Lapu-Lapu, nagkanayon nga gibantayan sab ang Puelo Verde sa barangay Basak sa posibleng pagbaha samtang ang bahin sa barangay Maribago migamit sa ilang suction pump aron di mosaka pag-ayo ang baha sa dapit.
Samtang ang Mandaue City nagmonitor sa sitwasyon sa Butuanon river ug Mahiga creek diin wa moabot sa critical level ang tubig base sa ilang river monitoring system gamit ang high definition ug infra-red camera sa Siyudad.
KLASE GISUSPENSO
Si Provincial Disaster Risk Reduction and Management Office (PDRRMO) head Baltazar Tribunalo nibutyag nga ang dakbayan sa Naga ug mga lungsod sa Asturias, Balamban ug Tabogon ang nisuspenso sa mga klase sa tanang ang-ang kagahapon tungod sa nasinati nga kusog nga ulan.
Matod niya, pipila ka local government units ang nisuspenso sa mga klase human ang Pagasa Visayas niisyu og red rainfall alert sa pipila ka bahin sa Metro Cebu ug Camotes Island.
Ang maong alert iisa kon maobserbahan nga ang sukod sa ulan kay sobra na sa 30 millimeters sud sa usa ka oras o kon ang ulan nagpadayon sud sa tulo ka oras ug sobra na sa 65 millimeters ang sukod niini.