Traffic enforcer nga nasikop sa buy-bust gitaktak

Gitang-tang na sa iyang trabaho sugod kagahapon ang usa ka traffic enforcer nga nadakpan atol sa buy bust operation sa niaging adlaw nga nakuhaan og dakong kantidad sa gidiling drugas.

Matod pa ni Francisco Ouano, hepe sa Cebu City Transportation Office (CCTO), nga wala siya makahibawo sa tumong sa maong traffic enforcer nganung nakabuhat siya’g illegal nga binuhatan nga unta anaa man siya magtrabaho sa gobiyerno.

Gikauwaw ni Ouano ang maong panghitabo nga nagdala og bating dungog sa ilang buhatan.

“Gusto unta ko nga limpyo lang ang departamento, ikauwaw jud ni nga insidente labi na sa ato-ang mayor,” matod pa ni Ouano.

Si Ouano miingon nga nakadawat sab siya og mensahe gikan ni Cebu City Mayor Tomas Osmena nga awtomatikong tangtangon sa trabaho ang maong enforcer.

Siya mibutyag nga ikatulo na ning higayon nga adunay enforcer nga nadakpan apan nanghinaot sab siya nga dili nani mausab pa.

Aduna say plano ang CCTO nga magpadrug test sa tanang kawani sa maong ahensya apan wala pa’y tukmang takda bahin niini. Miingon sab si Ouano nga tuig na sab sa trabaho ang maong enforcer.

Apan matod pa sab ni Osmena nga walay punto kung magpahigayon og drug test ngadto sa tanang kawani mahitungod lamang sa usa ka kawani nga nadakpan og illegal nga drugas.

“There is no need to this point to have everybody tested because one traffic enforcer has committed that violation. For example you found out that one City Hall employee has HIV, we also have HIV test to all 5000, no! But if we have 50, yes!” ingon pa sa Mayor.