Pamilya sa nurse nga napatay modangop sa CHR

Modangop sa Commission on Human Rights (CHR) ang pamilya sa namatay nga registered nurse nga napusilan sa pulis sa Talisay City human giingong nagpabuto sa iyang armas sulod sa usa ka kan-anan sa usa ka Mall.

Ang biktima pag-umangkon ni Konsehal Raul Cabanero kinsa maoy presidenti sa Ass. Of Barangay Council.

Usa ka Michelle Jeff Gabutan, 32, taga barangay Tabunok ug registered nurse ang napusilan patay niadtong Lunes pasado alas 4:00 sa hapon sulod sa usa ka kan-anan sa Gaisano Fiesta Mall sa Tabunok.

Matod pa, nga misulod ang biktima sa usa ka kan-anan ug adunay gikalalis nga manager ug sa sunod nga hitabo nagpabuto na kini sa iyang armas nga calibre .22

Natumong usab nga diha ang duha ka mga pulis nga sila si PO1 Erwin Denila ug PO1 Romanito Dinapo nga nadistino sa lugar ug didto nisuway kini sa pagbadlong sa biktima apan wala mopatuo ug miti-on ngadto sa mga pulis.

Tungod niini giunhan nalang sa pagpusil ni PO1 Denila ug maayong pagkaigo sa dughan. Dali kining gidala sa Talisay District Hospital apan nakabsan kini sa iyang kinabuhi.

Si Supt. Jason Villamater, hepe sa Talisay Police Station, mihatag og commendation sa duha niya ka mga sakop.

Iyang gitataw nga wala siyay nakitang sayop sa gihimo sa iyang mga sakop sanglit namiligro usab ang kinabuhi sa ubang tawo ug mismo sa iyang mga pulis. Apan bisan pa niini mohimo gihapon siyag inbestigasyon sa hitabo.

Matod ni PO1 Denila nga nisuway siya sa pagbadlong sa maong tawo.

Ug misuway kinig hostage sa usa ka tiguwang hinungdan nga iya nalang kining giunhan sa pagpusil.

Hinuon andam siya sa bisan unang imbestigasyon ug iyang ipamatuod nga nasunod niya ang rules of engagement.

Hinuon si Cabanero miingon nga adunay sayop ang iyang pag-umangkon.

Apan gusto lang niyang idangop sa CHR-7 aron sila na ang mohimog pakisusi kon anaa ba sa saktong paagi ang gihimo sa mga pulis.

Giangkon ni Cabanero nga aduna gyuy suliran ang iyang pag-umangkon tungod kay gibuwagan kini sa iyang asawa ug gawas pa sukad sa pagka bata niini hilumon na gayod kini ug dali ra nga masuko.

Nasayran nga ang inahan sa namatay bag-o lang naabot gikan sa Canada, ingon man ang namatay nagtrabaho kini didto isip usa ka nurse.