Dry run sa Traslacion nalangan

Dry run sa Traslacion kagahapon sa kadlawon diriyot makanselar sa dihang kapin sa duha ka oras og pinaabot sa urna nga gibutangan sa imahen ni Sr. Santo Niño ilabi na nga ang usa ka lane sa first bridge ingon man ang kalsada habig sa Lapu-Lapu ang gisira.

Inay nga sa 3:00 sa kadlawon gikatakda nga sugdan ang dryrun nga maoy oras sa pagpahigayon nga Traslacion karong Sabado (Enero 20), naabtan sa alas 5:00 sa kadlawon una miabot ang delegado sa St. Joseph Parish sa dakbayan sa Mandaue ingon man ang gikan sa Basilica Minore del Santo Niño.

Si Andy Berame, hepe sa Lapu-Lapu City Disaster Risk Reduction Management, nabalaka sa dihang anam-anam na nga nibiyahe ang mga public utility jeepney ug mga motorista aron sa pagtambong sa klase ug trabaho apan ang kalsada nga rota sa Traslacion pabilin pa nilang gisira.

“Kanang kalsadaha man gud is a vital artery sa business activity sa siyudad,” pulong pa ni Berame.

Nasayran nga dugay mibiya ang delegado sa Mandaue sanglit ilang gipaabot ang kadagkuan sa Basilica diin anaa sab ang presensiya sa rehiyonal nga director sa Police Regional Office (PRO)7 Chief Supt. Jose Mario Espino.

Nasuta nga ang duha ka kalihokan sa Traslacion sa managlahing schedule gi-usa og dry run hinungdan nga wa matuman ang gikatakdang oras.

Milanat ngadto sa 30 minuto ang dry-run sa motorcade gikan sa taytayan paingon sa Naval Base Navy.