Hinanggaw sa serbisyo
Kadako na sa suweldo sa mga pulis karon, makaako pa ang uban nga maghinanggaw sa ilang pagserbisyo sa publiko, sama sa nahitabo sa Toledo police station. Nasakpan sa akto sa direktor sa kapulisan sa lalawigan sa Sugbo ang usa ka pulis nga nabilin sa station ug nanirado pa nga murag walay tawo sa sulod ug ang iyang mga kauban nga giingong nanguli sa ilang balay.
Si Sr. Supt. Edgar Alan Okubo, direktor sa Cebu Provincial Police Office (CPPO), mao mismo ang nakasakop sa paghinanggaw sa kapulisan sa Toledo. Gikataho nga dunay alarma niadtong higayona apan walay pulis nakatubag o nakaresponde human nagpabaya sa ilang trabaho.
Dili madawat sa publiko, labina sa taga Todelo, nga palabyon lang ang pagbiya sa puwesto sa kapulisan. Isip tigpatuman sa balaud, kinahanglan nga manubag sila sa ilang paglapas sa balaud. Si Okubo niingon nga mopasaka og patungpatong nga kaso batok sa hingtungdang kapulisan tungod sa ilang pag-abandonar sa pwesto, neglect of duty ug absent without official leave (Awol) aron paghatag og leksiyon ug ehemplo ang kapulisan sa CPPO nga seryuso ang bokasyon sa pagkapulis diha sa pag-alagad sa publiko.
Gawas pa, ang kapulisan maoy unang mga kawani sa kagamhanan nga giumentohan pag-ayo sa ilang suweldo. Bisan ang labing ubos nga rangko sa pulis moambas na sa suweldo sa supervisor sa gagmayng pribadong kompaniya sa pangindahay nga dili na sila magbinuang sa trabaho.
Alang sa kapulisan sa Toledo nga nagbinuang, sayang ang inyong suweldo ug benepisyo karon nga pasakaan na kamo og kaso. Posibleng mahanaw lang kini sama sa aso ug maghilak lang kamo sa tago. Samtang, dalaygon ang gihimo ni Okubo nga nanniid kanunay sa iyang mga sakop ug nagdala kini og bug-at nga mensahe alang sa ubang presinto sa lalawigan nga magtinarong sa serbsisyo.