‘Cause and effect’

Gibalita nga gi-revoked sa Securities and Exchange Commission (SEC) ang incorporation papers sa Rappler kay matod pa nakalapas kini sa gimbut-an sa batakang balaod nga ang prensa kinahanglan 100 porsiyento nga gipanag-iya sa mga Pinoy.

Nakalapas sab kuno ang Rappler sa Securities Regulation Code tungod sa pagbaligya sa “securities” ubos sa Philippine Depositary Receipts.

Matod pa sa balita, adunay kontrol sa Rappler ang mga langyaw sama sa NBN Rappler LP og Omidyar Network Fund LLC. Dali sab kaayo nga mihimakak ang Rappler nga nakalapas sila sa balaod og misulti nga padayonon nila ang pakigbisog sa katungod sa prensa.

Matod pa sa Rappler, nagandam na ang ilang mga abogado sa pagkwestiyon sa desisyon sa SEC.

Husto kining gibuhat sa Rappler nga ipadangat sa hukmanan ang ilang kaso nga nagkwestiyon sa desisyon sa SEC.

Pinaagi sa maong legal nga pamaagi, makita og mahibaw-an didto sa hukmanan og kinsa ang husto – ang SEC ba o ang Rappler.

Apan dili husto kining gisulti sa Rappler nga gi-orderan sila sa SEC nga paundangon aron mahunong ang ilang pagsulti sa kamatuoran. Sayop pod na. Gipaundang sila sa SEC tungod kay nakita sa SEC ang ilang kalapasan sa batakang balaod og uban pang mga balaod sa Pilipinas bahin sa pagbaligya og “securities” ngadto sa mga langyaw.

Ang paghunong sa pagbalita epekto lang sa desisyon nga gibuhian sa SEC.

Buot ipasabot, dakong bakak ang ilang gisulti nga paundangon sila sa pagbalita sa katawhan.

Kon nag-agwanta ang ubang mga media sa Pilipinas pagpangita sa kwarta aron gamiton pagpadadan sa negosyo sa prensa, ang Rappler matod pa migamit sa usa ka pamaagi nga makapundo sa ilang negosyo ang mga langyaw.

Gihimo nila kini pinaagi sa pagbaligya sa matod pa “securities” pinaagi sa pag-isyo og “depositary receipts” ngadto sa duha ka mga langyaw nga grupo.

Dili kini pwede kay matod pa sa batakang balaod kinahanglan 100% nga gipanag-iya ang prensa sa mga Pinoy.

Imbes atakehon ang gobierno ni Presidente Digong, ang angay buhaton sa katawhan mao ang paghinuktok og husto ba ang gihimo sa Rappler o nakalapas ba gyod kini sa balaod.

Kon husto kini, mamatud-an man kini sa isang-at nga kaso sa Rappler batok sa SEC.

Kon husto kini, mag-atubang man og kaso nga kalapasan sa ilang katungod ang mga opisyales sa SEC nga mi-order sa maong desisyon.

Kon wala magtuman ang SEC sa ilang “rules of procedure” nga maoy gisulti sa mga kadagkoan sa Rappler, magamit nila kini nga basehan sa ilang kaso.

Nasayod nang daan ang Rappler nga gi-imbestigar sila sa SEC. Gani, miangkon ang Rappler nga nahibalo sila sa maong imbestigasyon.

Buot ipasabot, nasayod na silang daan nga ukayon sa SEC ang ilang mga records kabahin sa ilang “articles of incorporation” og uban pa nga mga papeles.