Dust in the wind
Gitan-aw kog dugay si Kier. Sagunson siyang nanghupaw. Nasabtan ko nga naguol gyud siya. “Kinsa man nang imong giingon, Kier, nga wa na?”
Sa akong pagtuo, matubag na ang daghang mga pangutana nga gusto kong mahibaw-an. Di na itago ni Kier nako ang tanan.
“Si Geraldine. She’s my childhood sweetheart. I know she loves me very much. That’s why nga gibugtian ko sab kini og pagmahal niya. We trust each other. But ang kahigayonan wa mosuportar sa among pagminahalay.”
“Siya ba ang rason sa kalit mong pagpauli sa Ginatilan ug sa pag-absent mog one week? Siya ba sab ang hinungdan nga kanunay kang nagmagul-anon?” Mitando si Kier.
“Wa siya makapadayog eskuwela sa college tungod sa iyang sakit. Duna siyay breast cancer.
Belinda. Dugay siyang nagantos ani. Gipapahuway na siya sa Diyos.”
Nasabtan ko na ang tanan. Gikuptan ko ang kamot ni Kier nga nagpatong sa ibabaw sa lamesa.
Namuwa ang mga mata ni Kier nga mitan-aw nako.
“I’m sorry, Kier, nga nahitabo kini niya. Condolence.”
“S-Salamat. Di gyud siya para nako, Belinda. Giampo ko sa Diyos nga nagmalinawon siya kon hain man siya karon.”
“Dunay daghang mga paagi ang Diyos aron pagsukod sa atong kalig-on, Kier. Ang kada usa sab nato may binuhat nga para gyud nato. Kana bang ilang giingon nga destiny.”
Igo lang mitando si Kier. Naghilom na siya. Wa na lang sab ko magtingog.
Dugay kong nakatulog. Gabii na sa among pagpamauli ni Kier. Naluoy ko kang Kier. Mao diay nga sukad sa among pagkaila nga dugay-dugay na man gyud unta apan wa gyud ko makakita niya nga nagmalipayon. Bisag smile man lang unta, wa gyud nako kini makita niya. Mao diay nga kanunay siyang motan-aw sa mga abog nga ipadpad sa hangin.
Dako diay kinig kahulogan para niya. Giisip niya nga si Geraldine parehas sa abog nga ipadpad sa hangin ug di na niya makita. Ug nahitabo na gyud kini karon, Namatay si Geraldine. Ug kay gilubong na, di na niya kini makita ug ikaestorya.
Nahunahuna ko nga pagkadako diay sa gugma ni Kier kang Geraldine. Suwerte si Geraldine.
Apan wa na siya. Angay nga dawaton kini ni Kier. (SUMPAYAN)