Ang bangas ni Butsoy
Diha si Butsoy sa ilang tugkaran, nagkugos ug naghapuhap sa iyang hiniktan nga igtatari. Miabot si Martin, iyang kumpare.
“Uy, taas gud ani nga klase sa manok, Pre!” ni Martin nga nakadayeg, dayong hapuhap sa manok ni Butsoy.
“Lagi, Pre. Bag-o ni nakong napalit, Pre.” ni Butsoy.
Si Butsoy naila nga sugarol nga tawo, apan wala pay nahibawo nga babaero sab diay kini, gawas kang Martin.
“Mao na, Pre Martin. Maayo pang manok kay hapuhapon pa. Ako ani, na ambot lang!” pasumbingay ni Lizette, asawa ni Butsoy, nga bigot kaayog lawas.
“Uy, ayaw pod ana, Pre, uy! Basin gipul-an na ka, Pre, maong wa na ka kabantay sa ka-seksi ni Mads. Hehehe!”
matod ni Martin nga nagpasiplat kang Lizette nga pinapilit.
Igo lang mitingsi si Butsoy. “Bakakon kaayo, Pre. Ingon siya nga moundang na siya anang panari og manok, pero hangtod karon wa pa gyud moundang!” ni Lizette. “Naa pay bangas niya, taas na kaayo. Dungan ra ba na sa pagsugod niya pagbisyo og manok!”
“Lagi. Promise, Babe, ako lang ning humanon ang Year of the Rooster ug dili na gyud ko manari,” ni Butsoy nga may sagol komedya.
Guwapo kini si Butsoy, pero medyo natibhangan lang og gamay tungod sa pagpataas niya sa iyang bangas. Kon negatibo man gani kini sa pagtan-aw sa ubang tawo apan mao ni ang nakapadani kang Shane. Puwerte gyung iboga ni Shane kang Butsoy ug miabot gyud ang panahon nga nahimong sila na. Apan miabot sab ang panahon nga napul-an na si Shane sa bangas ni Butsoy.
“Darling, pwede bang ipashave na nimo ang imohang bangas? Hugawan na man kong magtan-aw ana kay taas na kaayo!” matod ni Shane usa ka gabii niana.
“Ha? Basig matingala si Lizette, akong asawa!” ni Butsoy.
“Sige lang god. Pangita lang og paagi nga maka-rason ka.”
“Na hala, sige. Mao man kahay imong gusto!”
Gibalbasan ni Butsoy ang iyang bangas ug mipauli sa ilang panimalay. Naabtan niyang nahikatulog na si Lizette sa ilang lawak. Pawong na ang suga.
“Babe, tulog na ka?” matod ni Butsoy nga mitupad paghigda kang Lizette sa kama.
Nahigmata si Lizette sa pagdulog ni Butsoy kaniya. Gihikap ni Lizette ang nawong kon duna bay bangas.
“Uy, ikaw diay, Pre Martin! Nganong mibalik ka?” matod ni Lizette.
Wala makatingog si Butsoy nga nagnganga ang baba. (KATAPUSAN)