ELITE VS. KATROPA
Mga duwa karon 4:30 pm- Rain or Shine batok Phoenix 7:00 pm- Talk N’ Text batok Blackwater
Laing lig-ong puwersa ang pakuratan og suway sa Blackwater Elite sa ilang pagpakigbatok sa Talk N’ Text KaTropa sa main game karong gabii sa Philippine Basketball Association (PBA) 2018 Philippine Cup sa Araneta Coliseum.
Human sila nasubhan og kulbahinam nga kapildihan batok sa Meralco Bolts, 98103, ang Elite ningbangon ug namungot sa nagsunod nilang duha ka mga duwa diin ilang gipangsurpresa ang mga inilog nga Rain or Shine Elasto Painters, 92-87, ug Brgy. Ginebra Gin Kings, 94-77.
Sa ilang gipakitang duwa batok sa Elasto Painters ug Gin Kings, gilauman nga mahimo na ang Elite sa angayang kahadlukang puwersa sa liga.
Sa pagbalik nila ni Mac Belo ug Poy Erram unya sa paghiabot nila ni Allein Malicsi, Roi Sumang, Mike Digregorio ug Toto Jose, gipakita sa Elite nga dili na sila bastabasta.
“They are truly one of the up and coming teams in the league. They are building their team the right way,” paghulagway pa ni Ginebra coach Tim Cone sa Blackwater sa taho sa PBA.ph.
Mismong si KaTropa coach Nash Racela nipadayag og kabalaka sa dakong kalambuan nga nahitabo sa Elite.
Kon nagpalig-on og puwersa ang Elite, sama sa gibuhat sa ubang teams, ang KaTropa nawad-an og mga haligi sa pagkabalhin nila ni Ranidel de Ocampo ug Larry Fonacier.
Ang KaTropa aduna ra’y 1-2 nga rekord sa kasamtangan diin napilde sila sa Elasto Painters ug defending champions San Miguel Beermen. Midaog lang ang KaTropa batok sa Alaska Aces.
“We’ve been working on correcting our mistakes. And we’re hoping we could execute better,” asoy ni Racela.
Sa laing bahin, magsangka sa premirong duwa ang Elasto Painters batok Phoenix Fuel Masters.
Ang Fuel Masters naggunit og 2-1 nga rekord samtang ang Elasto Painters naghupot og 1-2 nga baraha.