CAVS GIUSBAN SA WARRIORS
Nipupo og 32 puntos si Kevin Durant unya midugang og 23 puntos si Stephen Curry aron agakon ang defending champions Golden State Warriors sa laing kadaugan batok sa ilang karibal nga Cleveland Cavaliers, 118-108, kagahapon sa National Basketball Association (NBA).
Ang Warriors, nga padayong nag-una sa overall standing dala ang 36-9 nga rekord, ningposte sa ika-13 nilang sunodsunod nga kadaugan sa mga duwa nga gipahigayon sa balwarte sa ilang kontra.
Matod ni Durant nga iyang nabantayan nga lahi ang ilang duwa kon mosulong sila sa kontra.
“At home, we just relax a little bit,” pasabot ni Durant. “This is who we are when we’re on the road.”
Ang Warriors nakadawat sab og 17 puntos gikan kang Klay Thompson ug 11 puntos gikan kang Draymond Green.
Ang Cavaliers, kansang sunodsunod nga kadaugan sulod sa ilang balwarte naputol sa 13, natagak sa 26-17.
Gipangulohan ni LeBron James ang Cavaliers pinaagi sa iyang 32 puntos, nidugang og 19 puntos si Isaiah Thomas samtang nitunol og 17 puntos si Kevin Love.
Ning maong season, kini maoy ikaduhang sunodsunod nga kadaugan sa Warriors batok sa Cavaliers, nga nakaangkon sa ikawalo nilang pilde sa miagi nilang 10 ka mga duwa.
Ang Cavaliers igo lang naggukod og duha ka mga puntos, 91-93, human sa tulo ka quarters una ningsutoy ang Warriors paingon sa 10 puntos nga kadaugan.
“It seemed like the rim just got smaller and smaller,” matod ni James. “But I like our effort. If we continue that going into our next few games, then I like where we are.”
Ang Warriors ug Cavaliers mao ang nag-abot sa finals sa miaging tulo ka mga tuig apan ning puntoha, daw usa lang kanila ang andam nga makabalik sa finals.
Hinuon nagtuo si Durant nga makabangon ra ang Cavaliers hilabi na kon hingpit na kining maka-adjust kauban si Thomas, kinsa usa sa mga nakuha sa Cavaliers gikan sa Boston Celtics baylo kang Kyrie Irving.
“Everyone knows it’s going to take a while to get into a comfortable groove here,” pasabot ni Durant.
“It’s a new system, so I don’t think this game was any indication of what’s going to happen with this team down the line. They’ll be much better than they are right now — and we all know that.” Sa laing mga duwa, ningdaog ang Charlotte Hornets batok Detriot Pistons, 118-107, Philadelphia 76ers batok Toronto Raptors, 117111, Milwaukee Bucks batok Washington Wizards, 104-95, Atlanta Hawks batok San Antonio Spurs, 102-99, New York Knicks batok Brooklyn Nets, 119-104, Chicago Bulls batok Miami Heat, 119-111, Memphis Grizzlies batok LA Lakers, 123-114, Oklahoma City Thunder batok Sacramento Kings, 95-88, Indiana Pacers batok Utah Jazz, 109-94, ug LA Clippers batok Houston Rockets, 113-102./