HEPE SA PRO 7 GITANGTANG, GIBALHIN

Hepe sa Police Regional Office 7 Chief Supt. Jose Mario Espino kalit nga gipahulipan sa Camp Crame bisan sa pagpangandam sa paghatag sa siguridad sa Sinulog.

Mipagawas og kamandoan ang Camp Crame pinitsahan Enero 18, 2018 aron pagrelibo kaniya bisan kritikal na ang pagpangandam sa kapulisan sa pagpatuman sa siguridad sa Sinulog.

Gahapon human niya madawat ang memorandum nagpahigayon pa sila sa Joint Security Conference uban ang Central Command alang sa Sinulog.

Si Espino nikompirmar nga iya nang nadawat ang kopya sa memorandum diin sugod sa Lunes siya na ang pangulo sa kapulisan sa rehiyon 10.

Matod ni Espino nga wa siyay mahimo sa kamandoan sa ilang labaw sanglit kabahin kini sa halapad nga lahugay sa mga opisyal sa kapulisan lukop nasud tungod sa pagretiro sa usa sa mga police director sa Camp Crame.

Ang mohulip kang Espino mao si Chief Supt. Robert Guzman Quenery gikan sa Police Regional Office 2 nga gradwado sa Philippine Military Academy batch ’85.

Takdo unom ka buwan niadtong Enero 17 ang pag lingkod isip PRO-7 director ni Espino human siya mihulip kang Chief Supt. Noli Taliño nga karon mao na ang director sa Special Action Force.

Hugot niyang gihimakak ang nanggawas nga isyu may kalabotan sa pasangil nga nagdawatan siya og payola gikan sa illegal gambling ug pagpanghilabot sa iyang asawa sa iyang trabaho nga walay kamatuoran.

WA PAHIBAW-A

Nakurat si Cebu City Mayor Tomas Osmeña sa kalit nga pagrelibo kang Espino.

Si Osmeña kinsa wala’y nakita nga problema kang Espino nagkanayon nga nakadungog siya sa isyu niini kabahin sa payola sa illegal gambling apan dili siya motuo niini.

Subay sa kalit nga pagbalhin kang Espino sa PRO 10, masaligon hinuon siya nga di makaapekto ang pagrelibo sa seguridad sa Sinulog.

Dugang ni Osmeña nga nakadungog siya og hungihong kabahin sa isyu sa payola ni Espino apan wa siya makadungog gikan sa iyang mga

contact sa barangay.

TRASLACION

Karong adlawa ang Traslacion diin dalhon ang imahe ni Sr. Sto. Niño ug sa birheng Maria sa Mandaue City.

Matod ni Cebu City Transportation Office (CCTO) operations chief Francisco “Isko” Ouano nga mag-agad sila sa gibag-on sa sakyanan ug tawo kon sirhan ba kini nila./