Motorsiklo di na paagion sa tunnel: Citom

Di na unya makaagi ang tanang motorsiklo sulod sa tunnel sa South Road Properties (SRP) subay sa nahitabo nga pagkadumbol sa mga sakyanan sa maong dapit niadtong Miyerkules.

Mao kini ang gibutyag sa operations chief sa Cebu City Transportation Office (CCTO) Francisco “Isko” Ouano.

Matod ni Ouano nga posible kining ipatuman human na sa Sinulog.

Gipasabot niini nga himuon kini nila alang usab sa kaluwasan sa kadaghanan nga magsakay og motorsiklo.

Niadtong Miyerkules sa hapon, siyam ka mga sakyanan ang nagkarambola sa tunnel, diin usa ka motorsiklo usab ang naangin.

Wa hinuon maunsa ang drayber ug sakay.

Gidid-an na niadto pa’ng nakalabay nga tuig nga moagi sa maong tunnel ang mga tanker apan dili mamahimo nga i-ban ang mga trucks nga moagi sa maong tunnel.

Mao usab kini ang pamahayag ni Cebu City Mayor Tomas Osmeña tungod kay nagdala man kining trucks og goods hilabi na sa industriya sa patigayon.

Dugang sa mayor nga ang usa sa katuyoan nga gihimo ang SRP kini aron mokatag ang industriya sa patigayon hilabi na sa habagatan.

Kini usab aron mokatag ang negosyo ingon man ang trabaho aron di magtapok sa dakbayan sa Sugbo.

Usa sa gusto ni Osmeña nga mopalit og radar aron ibutang sa maong tunnel diin mao kini ang mobasa sa gipaspason sa dagan sa usa ka sakyanan.

Gusto usab niya nga patasan pa ang multa sa molapas sa speed limit aron mosunod ang tanang drivers.

Dugang ni Ouano nga diha na unya Compaña Maritima moagi ang tanang motorsiklo kon hingpit na nila nga ipatuman ang pagban sa motorsiklo sa tunnel.