News editor sa SunStar Cebu namatay
Mahigugmaon sa pamilya, matinabangon, maayo nga mentor ug kugihan sa trabaho ang pipila sa mga pulong nga ikahulagway kang Olga Aledo-Campaña, ang news editor sa SunStar Cebu.
Si Campaña, gitawag sa iyang mga higala nga Gingging, hands-on sa pagpangandam sa dagko nga coverage sa SunStar Cebu labi na sa nagsingabot nga kapistahan sa Señor Santo Niño karong Dominggo.
Apan ang pagpangandam natukbangan og kasubo ug luha.
Alas 9:18 kagahapon sa buntag, si Gingging namatay tungod sa “ruptured aneurysm” sa panuigon nga 46-anyos. Ang aneurysm usa ka butoy sa ugat nga nagbara og suplay sa dugo ngadto sa utok. Dili mahibaw-an kung kanus-a kini mobuto ug kung mobuto, kasagaran makamatay.
Siya na-admit sa Chong Hua Hospital niadtong Enero 11 human mawagtangi og panimuot sa ilang balay sa dakbayan sa Carcar.
“Kuwang siguro ang usa ka issue sa newspaper para ma-describe nako si Gingging as mentor and friend sulod sa 17 years. Lingaw to siya kakuyog permi. Di mahutdan og storya,” asoy ni Charmaine Rodriguez-Kara, tigpamaba sa Metropolitan Cebu Water District ug kanhi news editor sa SunStar Cebu.
Matod niini nga dako nga kawad-on sa SunStar Cebu ug sa media industry sa Sugbo ang pagkamatay sa iyang higala.
Si Konsehal Yody Sanchez sa Barangay Busay dakbayan sa Sugbo ug laing suod nga higala ni Gingging nisaysay kon unsa kamapaubsanon si Gingging.
Sila nagkauban sa trabaho ni Gingging sayo nga bahin niadtong dekada 90 gikan sa dyRC hangtod namalhin sila sa Bantay Radyo.
Sud sa unom ka tuig nga nagkauban sila apan nagkabuwag dihang nadawat sa SunStar si Gingging.
“Bisan pa og dili nami kanunay magkita ug magkuyog karon sa trabaho pero kon makita mi sa field mura ra gihapon ug walay kausaban ang among pagtagad,” sugilon ni Sanchez.
Iyang gihulagway si Gingging nga buotan, maayo nga follower ug leader, masinabtanon ug matinabangon.
Emosyonal sab mipaambit si Vanessa Almeda sa mga handurawan nila ni Gingging diin nagkaklasmeyt sila sa major subjects sa Mass Communication sa University of the Philippines Cebu niadtong 1990.
Nakahinumdom si Almeda nga gihatagan og hagbong nga grado sa ilang maestro si Gingging ug nihilak pagmaayo.
“But Ging in later life proved she is beyond that failed grade. Mas labaw pa sa flat 1 iyang grade and when she ended up the news editor of Sunstar. Nilabaw gyud siya and I’m so proud of her,” dugang ni Almeda.