Apas BMO gibawian og sakyanan

Human mahibawo si Cebu City Tomas Osmeña nga gigamit gihapon ni Renato Jardaleza, Apas Barangay Mayor’s Office staff, ang sakyanan nga giisyu sa City Hall sa ilang opisina, gibawi na kini sa mayor.

Kahinumduman nga gitaktak ni Osmeña si Jardaleza human kini nalambigit sa pagpangsolicit gamit ang seal sa City Government.

Matod sa Mayor nga nakadawat siya og impormasyon gikan sa kasaligang tinubdan nini nga human si Jardaleza gitaktak sa trabaho niadtong Biyernes Enero 12, giingong nakit-an kini nga nag-drive sa sakyanan nga iya sa siyudad niadtong Martes.

“They’re ignoring me, okay. Ignore me, I ignore you same thing right? Politically I’m making a very bad move I don’t care I’m just doing what is right,” si Osmeña nagkanayon.

Si Osmeña niingon nga gibulingan ni Jardaleza ang iyang administasyon ingon man ang imahen sa BMO ug dili niya konsentihon ang ingon niining nga binuhatan.

Ang sakyanan gitugyan sa Mayor kang Apas Barangay Coucilor Virgil Cabigon nga maoy gitahasan ni Osmeña sa pag-atiman sa BMO hulip sa kanhi BMO Chairman nga si Joel Trompeta.

Naa na matod pa kang Cabigon kon iyahang i-terminate o dili ang mga BMO staff sa maong Barangay.

Usa sa gihatag nga tahas ni Mayor Osmeña kang Konsehal Cabigon mao nga tutukan niini ang Long Life Medical Assistance Program (LLMAP) nga iyang gihulagway nga ang tanan mamahimong makabenepisyo niini.