MATAHOM NGA BOARDWALK SA NAGA
Sukad giablihan sa publiko ang boardwalk sa dakbayan sa Naga, lalawigan sa Sugbo wa kini mahubsi sa mga nakuryuso sa bag-ong suroyanan sa dakbayan.
Kapin sa tulo ka buwan human sa pag-abli niini niadtong September 2017, halos matag adlaw kanunay na kini nga gidugok sa mga tawo di lang sa mga lokal nga residente apan lakip na sa mga lumolupyo sa mga silingang dakbayan ug lungsod ang dapit. Hayahay ang boardwalk sa Naga. Imong makita dinhi ang maanindot nga kadagatan sa dakbayan busa di ikalimod nga nipatok kini sa magpamilya, managhigala ug managuyab. Bisan ang mga paingon kaslon nga manag-uyab usahay mohimo sa ilang pre-nup
photoshoot sa dapit. Matod ni Arthur Villamor, city administrator sa Naga, nga ang konsepto sa boardwalk nga trending sa social media naggikan ni kanhi mayor Valdemar Chiong. Gisugdan pagtrabaho ang proyekto niadtong 2016 ug nahuman sa mga tunga-tungang bahin sa milabayng tuig.
Adunay gilapdon nga 20 metros ug gilay-on nga 198 metros ang boardwalk, dugang ni Villamor. Sa dihang gikahinabi ning mantalaan si Villamor kini nagkanayon nga mokabat ngadto sa P57 milyones ang gitagana sa dakbayan alang sa proyekto.
Giangkon ni Villamor nga nadugay paghuman ang proyekto human nga nabanggaan sa barko ang boardwalk sa dihang naigo sa unos ang dakbayan niadto, gawas niini, nadugay sila sa pagpili sa saktong klase sa kahoy nga ibutang niini.
Paambit ni Villamor nga dako og matampo sa ekonomiya ang suroyanan.
“It will boost the economy and tourism. Di sab nimo mameasure, ma-quantify ang kalipay sa tawo nga mobisita dinhi,” dugang ni Villamor.
Planong palambuon Matod ni Villamor nga ang boardwalk nakit-an sa nabantog nga Cebuano furniture designer Kenneth Cobonpue ug kini adunay
sugyot sa kagamhanan unsaon nga mas panindoton ang dapit. Si Cobonpue gikatakdang mohatag sa iyang proposal sa Phase 2 sa pagpanindot sa boardwalk, sigun ni Villamor.
Sumala ni Villamor nga mas paninduton unya ni Cobonpue ang boardwalk pinaagi sa iyang disenyo.
Gawas niini, plano sa kagamhanan nga butangan kini og official landmark, opisyal nga pangan, mga specialty stores sama sa coffee shop ug mga kan-anan.
Tukoron sab sa kagamhanan ang administration building aron maoy motan-aw sa operasyon niini, maghimo og
guidelines alang sa mga buot mobisita niini ug uban pa.
Matampo sa Kalimpyo Nanawagan si Villamor sa mga buot mobisita sa boardwalk nga kon mahimo, hipuson ang kaugalingong basura niini ug di ilabay sa dagat. “Pwede ra makadala og
food, usahay lagi di man pud sila mo-contribute sa cleanliness ilabi na ang mga batan-on,” padayag ni Villamor.
Dugang niya nga adunay mga gi-deploy nga green marshal ang dakbayan aron sa pag-edukar sa mga nibisita kalabot sa kalimyo sa dapit.
Abli ang boardwalk tibuok adlaw, apan mas modagsa ang mga tawo mga alas 8 sa gabii pataas, matod ni Special Program and Projects head Ruth Rowena Alensonorin.
Dugang niya nga plano niyang i-propose sa mayor nga mohimo og palisiya kalabot sa oras nga ablihan sa publiko nga hangtod nalang unya kini sa alas 10 sa gabii alang sab sa seguridad sa tanan. / Mga hulagway gikan nila ni Alan Tangcawan, Jay-R dela Calzada, Sergie Tokmakov, Naga Akong Garbo FB page