Basta mosunod sa proseso

Kada administrasyon nga ningsunod sa pamunoan ni anhing presidente Corazon Aquino dunay tinguha sa pag-usab sa Batakang Balaud pinaagi sa usa ka plebisito. Dinhi naumol ang terminong Chacha kun Charter change. Karon sa administrasyon ni Presidente Rodrigo Duterte, nitumaw na sab kini pagbalik tungod sa pederalismo ug Bangsamoro Basic Law (BBL).

Sa panahon ni kanhi Presidente Fidel V. Ramos, duna nay tinguha sa pag-usab sa Constitution tungod kay kuno, dunay probisyon nga nagpugong sa ekonomiya sa nasod nga paspas nga makatubo.

Karon, lahi na. Gikinahanglan nang usbon kay wa na matukma sa panahon taliwa sa panghingusog sa pag-usab sa sistema sa pangagamhanan.

Apan daghan ang nangabalaka kon usbon ang Constitution nga ipahaum kini sa unsay kagustohan sa maghupot sa ryenda sa kagamhanan, labina sa paglugway sa termino. Ang gipasikaran niini mao ang panahon sa martial law ni anhing presidente Ferdinand Marcos, diin ang Batakang Balaud gitahi pahaom sa iyang kagustohan.

Bisan tuod sa mao nga kasinatian, angay usab tan-awon ang mga panginahanglan karon. Tinuod bang gikinahanglan nga usbon ang pipila ka mga probisyon sa Batakang Balaud?

Kon gikinahanglan man, mas maayong kini debatihan, tukion sa pampublikong mga forum ug magtukod og constitutional body alang niini.

Gikinahanglan ang transparency sa pagtuki sa pandayon nga mga probisyon aron di mahadlok ang katawhan.

Unya, di manglaktaw, ipaagi kini og referendum diin ang katawhan dunay kahigayunan sa pagpadayag sa ilang baruganan, supak ba sila o dili sa giduso nga kausaban sa Constitution.

Basta ipasubay ang tanan sa hustong proseso, seguradong di mabalaka ug mahadlok ang katawhan. Basin panahon na diay sa kausaban.