Liquor ban sa Sinulog?

Miluwat si Cebu City Mayor Tomas Osmena og usa ka executive order nga magpatuman sa higpit nga pagdili sa pagbaligya ug pag-inom og bisan unsang ilimnong makahubog sud sa distansiya nga 300 metros gikan sa rota sa Sinulog Grand Parade karong Dominggo.

Ang liquor ban magsugod sa alas 6 sa buntag sa Enero 21 hangtod sa alas 6 sa buntag sa Enero 22. Mokabat sa 24 oras ang liquor ban sa rota nga maagian sa Sinulog Grand Parade gikan sa Imus Road, Osmena Blvd. ug General Maxilom avenue nga tawgon gihapon nga Mango avenue.

Lakip sa liquor ban ang mga restaurant ug hotel nga anaa sa rota sa Sinulog. Ang ubang mga bar nga maagian sa Sinulog manira na lang samtang ang uban magpabiling abli pero pagkaon ray ikabaligya tungod sa liquor ban.

Gidili gihapon ang mga ilimnong makahubog bisan kon anaa ka sa sud sa hotel. Lakip niini ang room service. Ang liquor ban ni Mayor Osmeña mas higpit pa sa liquor ban sa panahon sa eleksyon nga exempted ang mga langyaw. Sa liquor ban sa Sinulog, apil ang mga langyaw.

“Restaurants are not exempted, hotels are not exempted, foreigners are not exempted, room service is not exempted given that they are within a 300-meter radius,” matod pa ni Osmeña.

Ug di lang kay liquor ban ra. Gidili usab ang mga shows, concerts, performances, gigs, recitals, events, street parties ingon man mga loud speakers sud sa 300 metros nga radius sa rota sa Sinulog Grand Parade.

Kining pagpatuman sa higpit nga liquor ban tubag sa mga kaguliyang nga nahitabo human sa Sinulog Grand Parade sa miaging tuig. Naghuot ang mga kadalanan tungod sa mga street parties sa mga estlisimiento nga nisuyla ngadto sa kadalanan.

Apan makawagtang ba kaha kini sa mga palainom? Ang Sinulog usa ka selebrasyon, ug kinaiya sa mga Pilipino nga kon dunay selebrasyon, naa gyuy inom. Ang mga palainom moinsistir nga lahi sila sa mga palahubog nga magmaoy kon mahubog na.

Matod pa nila, ang usa ka tawo nga moinom unya moligid sa kahubog ug matug, mao kana ang palahubog. Pero kadtong moinom, moligid apan mobarog kay moinom pagbalik, mao kanay palainom.

Apan unsaon man pagpatuman sa mayor ang iyang liquor ban? Matod pa ni Osmeña kuwang siyag tawo sa pagsikop sa makalapas sa liquor ban. Pero kadtong mga business establishments nga mosupak niini iyang pasirad-an.

“Take your chances, but if you’ll get caught, you’ll be closed. Sanctions will be closure for one month or three months or forever. It will depend on the severity of the violation. If it is clear abuse and defiance, it will be closed forever,” matod pas mayor.