Lalis sa Con-Ass
Galalis ang Ubos Balay-Balauranan, nga kanunay nga tawgon og kongreso, ug ang Senado kalabut sa pag-convene sa duha isip constituent assembly (con-ass) sa tuyo nga pag-amendar sa atong Batakang Balaud.
Ang kongreso nipasar og resolusyon nga nag-awhag niini ug sa Senado nga maghiusa sila isip con-ass apan ang senado mipasar usab og resolusyon nga maghimo og senate con-ass. Dili sila gusto og joint session tungod kay malumos ang ilang botos tungod sa kadaghan sa mga sakop sa kongreso.
Ang sad-an niini mao ang nalatid sa Article XVII Section 1. Any amendment to, or revision of, this Constitution may be proposed by: The Congress, upon a vote of three-fourths of all its members; or a Constitutional Convention.
Sumala sa kongreso nga ang Congress nagpasabut sa duha ka balay-balauranan. Apan bisan gani ang pangulo sa PDP-Laban Senate President Aquilino Pimentel III ug daghang mga sakop sa super majority sa Senado supak sa baruganan ni House Speaker Bebot Alvarez ug mayoriya sa kongreso. Sumala nila nga bisan gani sa pagpasar og ordinaryong mga balaud linain man ang sesyon sa Kongreso og Senado. Ang tinuod nilang gikahadlukan mao nga mawala silay pulos kay 23 ra sila ka buok, apil kang Leila de Lima nga anaa sud sa bilangguan, itandi sa kapin 200 ka mga sakop sa kongreso.
Tungod niining maong debate imposible nang matuman kadtong giingon ni House Speaker Pantaleon Alvarez nga ilang mahuman ang draft amendment nga isumiter ngadto sa plebisito dungan sa barangay ug sagguniang kabataan elections karong Mayo.
Ang mga kongresista ug mga senador uyon nga amendahon ang 1987 Constitution apan wala lang sila magkauyon kon linain ba o joint session ang con-ass. Nahadlok ko nga gimaldisyon kining pag-usab sa Cory Aquino constitution kay daghan na kaayong administrasyon ang napakyas sa pag-amendar unta niini. Goodbye cha-cha.
Daghan kaayong kahugpongan sa media ang misaway sa Securities and Exchange Commission (SEC) sa pagkanselar niini sa certificate of registration sa Rappler, usa ka online news website. Ilang gipasanginlan si Presidente Rodrigo Duterte nga maoy nagsugo sa pagpasira niini.
Tungod man gud kini sa hugot nga pagsaway ni Duterte sa reporting sa Rappler nga kanunay mobanat sa iyang administrasyon. Apan gidepensahan sa SEC, nga pinangulohan ni Chairman Teresita Herbosa, ang ilang desisyon.
Ang National Press Club (NPC) mipasidaan hinuon nga dili dayon tawgon nga hulga sa freedom of the press ang nahitabo sa Rappler. Kinahanglang sutaon kon aduna bay basihanan ang SEC sa ilang gihimo ug nga wala kini nagpagamit sa Duterte administration.