Pit Senyor! Sa mga Pinoy kini!

Pista Senyor na pod! Mag-ambahan na usab ang mga debotos sa Balaang Bata, si Senyor Santo Niño, sa pagtambong sa mga kalihukan sama sa mga misa, traslacion, fluvial procession, reenactment sa unang pagbunyag nila ni Rajah Humabon ug Reyna Humamay, ang solemneng prosesyon sa kadalanan sa dakbayan ug uban pa.

Kon magpanon man gani ang mga taga gawas sa dakbayan aron pag-apil sa mga kalihukan, segurado kong di magpapilde ang naa sa Cebu City ug mga silingang dapit mismo.

Kining pagdugok sa mga tawo sa Basilica ug sa mga kalihukan kalabot sa pista nagpamatuod lang sa linya sa Gozos ni Sr. Sto. Niño nga ‘batobalani sa gugma’ o magnet of love diin bitaron sa katingalahang gahum ang mga debotos.

Hinaut nga malinawon ug malampuson ang pagsaulog. Pit Senyor!

***

Di kalikayan nga makompara ang duha ka mga dagkong prosesyon sa duha ka dagkong pista sa nasud: ang pista sa Itom nga Nazareno sa Quiapo ug sa Senyor Santo Niño sa Cebu.

Managlahi ang paagi sa pagpakita sa pagtoo sa mga deboto. Lainlaing paagi, usa ra ang tumong: ang Ginoong Jesus. Atong ipadayon ang pagpalambo sa pagtoo aron ‘malipay ang Ginoo,’ matud pa sa kanta sa Sinulog.

Pit Senyor! Sa mga Pinoy kini!

***

Sama sa naandan, ang mga higanteng TV network magpalabwanay sa ilang pag-apil sa Pista Senyor ug sa Sinulog, ang labing dakong festival sa nasud. Pero sa dili pa, mopasundayag una sila si Regine Velasquez, Christian Bautista ug Julie Anne San Jose sa concert nga 3 Stars, 1 Heart sa Waterfront Cebu City Hotel ugma, Enero 20.

Samtang makighimamat usab ang mga artista sa The One That Got Away (Lovi Poe ug Dennis Trillo), Kambal, Karibal (Bianca Umali ug Miguel Tanfelix) ug Sherlock Jr. (Ruru Madrid ug Matt Evans) sa Kapuso Fiesta sa Cebu Business Park.

Seguradong atangan sa mga fans ang Kapuso Sinulog float sa Dominggo, diin ang multitalented actress/TV host nga si Rhian Ramos ug ang versatile leading lady nga si Max Collins ubanan sa GMA leading men nga sila si Ivan Dorschner, Migo Adecer ug Jason Abalos sa paglibot sa rota.

Singgit, lukso ug piktyurpiktyur to da maks gyud ang buhaton ba! Mahimog dili?

***

Ang ABS-CBN mopahigayon usab sa Kapamilya Caravan sa Robinson’s Galleria ugma, Enero 20. Ang mga artista sa Ikaw Lang Ang Iibigin (Coleen Garcia, Kim Chiu, Gerald Anderson ug Jake Cuenca), Asintado ( Julia Montes ug Aljur Abrenica) ug Sana Dalawa ang Puso ( Jodi Sta. Maria) ang mga bida.

Sila si Julia, Aljur ug Shaina Magdayao (Asintado) ug Richard Yap ug Jodi (Sana Dalawa Ang Puso) ang motungtong sa Kapamilya Float sa Sinulog Grand Parade sa Dominggo.

Seguradong mokarat ang tunlan sa mga fans sa pagsininggit alang sa ilang mga idolong Kapamilya stars. Bahalag mapagaw ug mainitan (o maulanan ba kaha, simbako lang), basta lingaw.

Anà lang gyud! Pit Senyor!