Dalilang sa kawasan

Layo na si Waldo sa naglutos kaniya. Kon wala pa siya makaambak sa sakyanan sa mga pulis nga mohatod kaniya ngadto sa dapit diin adto siya bilanggoa, tingali tua na karon siya didto. Wala siyay nahimong kasalanan. Ang ilang gipasangil kaniya nga siya ang nagpatay sa silingan nilang maton nga si Dorok dili tinuod.

Ang pasangil nagsaysay nga usa ka mamingaw nga udtong tutok samtang nag-inom og bino si Dorok sa suki niining imnanan, may nagmaskarang tawo nga kalit mitumaw ug gipusil si Dorok. Human niini hinay nga milakaw ang mamumuno dayong sakay sa iyang motorsiklo. Ug nahinumdom si Aldo nga usa ka hapon gianha siyang mga pulis sa ilang balay kay siya maoy suspek sa kamatayon ni Dorok. Gipasakaan siyag kaso nga murder sa korte. Klaro kuno nga siyay gitudlo sa testigo nga mipatay kang Dorok agig panimawos sa pagkulata niini kaniya. Tinuod nga gikulata siya ni Dorok, apan nahusay na sila sa kapitan sa ilang barangay. Apan sumala sa kapulisan lig-on ang motibo nga patyon niya si Dorok kay nasamdan siya sa ulo dihang gibunalan siya ni Dorok ug basiyong botelya sa beer nga didto mapulpog sa iyang ulo.

“Dili nako kana mabuhat, Nay Cedeng, uy!” matod ni Aldo ngadto sa iyang inahan human siya hukmi ug human siya basahi sa desisyon nga siya sad-an. Gikan sa korte gidala siya sa mga pulis aron ibalhog sa bilanggoan. Gipasakay siya sa usa ka pick-up nga maoy modala kaniya ngadto sa CPDRC

Samtang nagdagan ang sakyanan nalipat ang nag-guwardiya kaniya dihang dinha na sila sa tulay sa likuanan diin dunay lawom nga tubig sa ubos. Kalit siyang milayat ug didto siya tugpa sa tubig. Mitidlom siya sa tubig. Misawom siya ug milangoy bisan dunay pusas ang iyang mga kamot.

Karon nia na siya sa ngilit sa usa ka busay. Bugnaw dinhi ug anhi una siya magpalabay sa mga takna. Layo na kini, apan segurado siya nga gisundan siya sa mga pulis nga nag-eskort kaniya. Unya nabati niya nga may tingog gikan sa nag-ambak nga tubig. Daw nag-awit ug mituhop sa dughan ni Aldo ang tingog nga giduyogan sa hinaganas sa tubig. Daw may nabati siya nga tingog sa usa ka babaye. Pero nagtuo siya nga hinungaw lang kini sa iyang kakutas, kauhaw ug kagutom. Apan taliwala sa naggabon nga talan-awon may bayhon sa usa ka maanyag nga babaye milutaw daw multo diha sa tampi sa linaw. Katahom niya! Nakatuaw si Aldo. Dihay tukmod sa kaibog nga midumbol sa iyang galamhan.

Miduol ang babaye kaniya ug hinay nga namulong, “Ako si Maria Flordelis, ang dalilang dinhi sa busay. Nganong nahiabot ka dinhi, layo kining dapita?”

“Usa ako ka tawo nga gipasanginlan sa krimen nga wala nako mabuhat,” matod ni Aldo.

Naminaw ang dalilang sa kawasan. ang tag-iya sa tingog ug awit nga nahimong duhawit sa bul-og sa tubig ug sa awit sa kamingawan. Mitupad paglingkod ang engkantada kang Aldo ug miawit. Nahikatulog si Aldo.

Dihang nahigmata si Aldo diha na siya sulod sa usa ka payag naghigda. Gibati siyag kagutom. Misulod sa payag ang usa ka tiguwang lalake.

“Nahigmata na diay ka, Undo?” matod sa tiguwang. “Gahapon sa udto ka pang way panimuot. Nakaplagan ka sa akong apo nga si Mariflor didto sa tampi sa kawasan. Gidala ka namo dinhi. Ang imong pusas akong gilugit og alambre mao nga natangtang.”

Unya dihay misulod nga usa ka maanyag nga babaye nga nagdala og panaksan nga may sulod nga linugawng mais. “Kaon ani, Manoy, aron mobalik imong kabaskog,” matod sa babaye. Gikaon ni Aldo ang lugaw. Gitutokan niya ang dalaga ug nahihumdom siya kang Maria Flordelis.

Paglabay sa tulo ka adlaw may tulo ka pulis nga nangabot sa payag sa tiguwang lalake. Gidakop siya. Miingon ang lider sa mga pulis, “May tawo nga misurender ug mitug-an nga siya ang nagpatay kang Dorok kay si Dorok maoy naglugos sa manghod niyang babaye. Dad-on ka namog balik sa siyudad aron malimpiyuhan imong ngalan.” Samtang naglakaw si Aldo kuyog ang mga pulis, iyang nasigpatan didto sa nag-ambak nga tubig ang binuhat nga nailhan niya sa damgo lang. “Maria Flordelis!” misinggit si Aldo. Napugwat ang mga pulis. (KATAPUSAN)