MOBILE APP SA SINULOG
Ang Sinulog 2018 naggamit og
high-tech nga mobile app aron maingganyo ang kabatan-onan lakip na ang bag-ong henerasyon nga mosalmot sa Sinulog karong Dominggo.
Ang maong mobile app dili lang para sa mga kabatan-onan apan apil na sab ang mga deboto niini atol sa selebrasyon.
“Just search and download ‘Sinulog 2018’ in Google Play or the App Store and install the app
in your smartphones,” ingon pa ni Cebu City Councilor Dave Tumulak, Execom chairman.
Dugang pa niya nga dakong tabang ang maong app ngadto sa katawhan aron mas sayon ug mas dali ang pagsuroy o ang pag-salmot mismo sa labing grandeng kapyistahan sa Sugbo.
Gipaningkamotan sab kini ni Cebu City Mayor Tomas Osmena nga mahimong posible ang paglusad sa maong app sa gipahigayon nga Sinulog Foundation board meeting kaniadtong Disyembre.
Gipaambit ni Osmena ang iyahang mga panlantaw nga mamahimo kining mopaduol ngadto sa bagong henerasyon ug may kalambigitan sab kini sa mga digital Cebuanos.
“With the millennials growing up, we are also welcoming the generation Z. Thus, you might have already noticed our sleeker Sinulog Foundation website. Our facebook page has grown exponentially,” dugang pa ni Tumulak. Mikoordinar sab sila 24 oras ngadto sa mga nagkalain-laing grupo sa media sa Cebu Provincial Capitol, sa Philippine Information Agency (PIA) ug Cebu’s blogging community.
Nagpasalamat sab si Tumulak sa Cebu’s tech startups nga usa sa hinungdan nganung nahimong posible ang paglusad sa ‘Sinulog 2018’ app atol sa pagbukas sa programa sa “Kalingawan sa Plaza” nga gipahigayon sa Plaza Independencia.
Matod ni Tumulak, ang maong mobile app motabang sa paglaraw sa rota sa Sinulog apil na sab ang mga iskedyul taliwala sa daghan kaayong relihiyoso ug kultural nga mga kalihokan kada adlaw atol sa Sinulog Festival Week.
Pinaagi sab sa app, makakuha ka og mga impormasyon mahitungod nga mamahimo nimong ma-access ang sukaranan nga kasayuran mahitungod sa nagkalainlaing mga kalihokan sa Sinulog ug mga detalye sama sa mga contingent sa parade, mga mapa sa opisyal nga mga rota sa parada, ug kung asa pwede mag-party.
Makabaton sab kini og mga balita mahitungod sa mahinungdanong mga pahibalo ug mga kalamboan nga mahitabo ingon man usab dihadiha dayon kining ipakigbahin sa mga higala ug mga paryente dinhi ug sa gawas sa nasud pinaagi sa social media.
Ang labing nakanindot sa maong app mao ang mga tiggamit niini mahimong mobotar alang sa ilang paborito nga Festival Queen 2018 nga kandidata pinaagi sa pagpili kanila gamit mismo ang ‘Sinulog 2018’ app.
Ang paghulagway sa app sa Google Play Store nag-ingon nga ang Sinulog 2018 app naghatag kanato og kasayuran nga gikinahanglan sa pagpahimulos sa usa ka pista nga nagsaulog sa pagkahimugso sa Kristiyanismo sa habagatang sidlakan sa Asya.
Ang maong kapyistahan naghiusa sa sidlakan ug kasadpang bahin samtang kini nagsaulog sa usa ka lumad nga sayaw sa pagsimba nga gitawag og Sinulog nga gipahinungod sa Senyor Sto. Nino, ang Balaang Bata nga si Jesus.