RAVENA, NLEX VS. FAJARDO, SMB
Ang pagdugtong sa sunodsunod nga kadaugan maoy natala karon sa alimpatakan sa wala pay pildi nga San Miguel Beer sa duhang ilang ikasangka ang NLEX Warriors sa main game karong gabii sa PBA Philippine Cup sa Cuneta Astodome.
Ang Beermen (3-0) nga labas pa sa ilang kadaugan batok sa TNT Ka Tropa sa ilang outof-town game didto sa Ilo-ilo niadtong Sabado, gipaabot nga makasugat og hugot nga kombati batok sa Warriors nga gipangulohan karon sa batan-ong si Kieffer Ravena uban sa mga beterano nga sama kanila ni JR Quinahan ug Cyrus Baguio.
Inilog man tuod San Miguel Beer, apan ubos sa kamanduan ni coach Yeng Guiao, ang Warriors (2-2) adunay igong determinasyon nga mopakgang sa Beermen nga gibituonan sa Sugboanong multi-awardee nga si June Mar Fajardo kinsa gipaabot nga makadawat og igong suporta nila ni Arwind Santos, Alex Cabagnot, Chris Ross ug Mario Lassiter.
Laing sikit nga kombati ang masaksihan karong gabii sa dihang makigtagbo sulod sa korte ang GlobalPort ug ang nagkaumento nga Blackwater Elite sa preliminary game.
Ang GlobalPort nga padayong dili makapaduwa sa ilang star player nga si Terrence Romeo tungod sa inju- ry, yanong mipukan sa Rain Or Shine Elasto Painters niadtong Biyernes aron irehistro ang ilang unang kadaugan.
Sa kasamtangan, nagpakita og maayong resulta kining kombinasyon karon ni coach Leo Isaac tali sa mga bag-o ug beteranong mga players. Si Mac Belo ang nagpakitag saktong labok bisan sa iya pang kalinghuron sa lega apan ang liderato ni Mike Cortez ug Allein Maliksi ang nagsilbing giya sa ilang opensa.
Subay niini, human sa duha ka sunodsunod nga kapildihan, mibangon ang Rain or Shine Elasto Painters nga daw sama sa usa ka liyon nga samdan nga mikuniskunis sa Phoenix Petrolium, 120-99, niadtong Miyerkules sa gabii.
Kon dimalas ang ilang nasinati sa ilang kapildihan batok sa GolbalPort diin gilimitahan lang sila og 70 puntos, ning higayona ang Painters nangigo sa bisan asa nga angguloha ug daling mipaulbo og 39-13 nga rally sa first quarter nga maoy ilang gihimong ganghaan paingon sa kadaugan.
Si Ed Daquioag ang unang mipakita sa iyang kahanas ug mikutlog 21 puntos, lima ka rebounds, lima ka assists, usa ka steal ug usa ka block sa wa pa kini matagak sa third quarter.
Samtang sama sa Rain or Shine, mibangon usab ang TNT KaTropa human mapildi sa San Miguel Beer sa ilang out-of-town game sa Ilo-ilo City (88-76) niadtong Sabado, pinaagi sa pagdominar sa Blackwater, 92-83, sa main game.
Ang Sugboanong si Roger Pogoy maoy nangulo sa Texters nga may 24 puntos gawas sa iyang walo ka rebounds, tulo ka assist ug tulo ka steals samtang si Jayson Castro midugang og 17.