MO-COUNTERFLOW SUGDAN NA OG IMPOUND
SUGOD UGMANG ADLAWA KON MADAKPAN SA CITOM
Sugod ugmang adlawa, ipatuman na ang 30 ka adlaw nga pag-impound sa mga sakyanan nga madakpan nga mo-counterflow sa kadalanan sa dakbayan sa Sugbo.
Kini human gipirmahan na ni Cebu City Mayor Tomas Osmeña ang executive order nga nagmando niini.
Matod sa operations head sa Cebu City Transportation Office (CCTO) Francisco “Isko” Ouano base sa nakalatid sa Executive Order No. 034 sa mayor, nga ang driving left o kaha ang gitawag nga driving
counter-flow maisip nga reckless driving subay na sa Republic Act No. 4136, City Ordinance No. 801 ug ubang traffic circulars, rules and regulations.
Gideklarar usab sa kagamhanan sa siyudad sa Sugbo nga ang tanang klase sa reckless driving hilabi na ang driving left o counter flow usa ka purhisyo. Ang mga makalapas niini pahamtangan og tukmang silot.
“Reckless drivers or violators shall be prosecuted in accordance with the existing traffic laws, ordinances, circulars and rules and regulations. Moreover, prosecution of the driver notwithstanding, the motor-vehicles used or involved in the commission of the offense/ infraction shall measure and shall be impounded for a period of not more than thirty (30) days without cost on the part of the violator,” tipik sa EO nga gipagawas ni Osmeña. Dugang ni Ouano nga bisan og wala pa pirmahi ni Osmeña ang EO, ang ilang mga traffic enforcer nanakop na nining mga motorista nga mo-counterflow, apan ang ilang nabuhat mao lang ang pag-isyu og citation ticket nga dunay multa nga P500.
Hinuon, nakita sa CCTO nga gamay na lang ang mo-counter flow human gipahibawo sa mayor ang pag-impound sulod sa 30 ka adlaw mga sakyanan kon madakpan nga mag-counter flow.
“Mo-sample gyud ta, ipakita gyud nato, not only sa counter flow kaning driving left also kaning pedestrian ug kaning junction box. I-impound nato, niingon naman gyud si Mayor wala siya’y pakialam aning penalty as long as ma-impound lang, I think sa storage sad I think ipa-free niya. Naay P100 ang motor, ang awto is P300 human ang truck is P500,” matod ni Ouano.
Gipahibawo sab ni Ouano nga adunay igong lugar nga kabutangan sa mga motorsiklo, sakyanan o kaha truck nga maimpound diha sa South Road Properties duol sa ilang impounding nga moabot sa 1.5 hectare.