Dugang honorarium sa mga Tanod

Makadawat og dugang nga honorarium ang mga barangay tanod sa Barangay Taptap ug Bonbon, dakbayan sa Sugbo epektibo niadtong Oktubre hangtod sa Disyembre 2017.

Gikan sa P4,000 nga madawat, doblehon na kini ug mamahimong P8,000 tungod dali kini mosunod gyud sa mga gimando ug ipatuman gyud kini dayon.

Si Garry Lao, pangu sa Cebu City Office for Substance Abuse Prevention (COSAP), nagkanayon nga wala kini nakita nga problema sa mga tanod sa Barangay Taptap ug Bonbon.

“In terms sa campaign sa anti-illegal drugs sila mismo naa. In fact inig papatawag nato sa drug surrenders naa sad sila. We conducted even home visit sa atong mga drug surrender naa sad sila,” matod ni Lao.

Apan sa karong tuiga gitan-aw pa kini karon ug angay pa ba kini ipadayon hilabi na dunay mga barangay tanod nga wala misunod sa mga panginahanglanon.

Usa na niini ang Barangay Ermita ug Carreta nga temporaryo gisuspenso ang paghatag og allowance niadtong Disyembre lang tungod wala kini nakahata'g saktong taho.

Gibutyag sab ni Lao nga ang COSAP nagpahigayon og Certification of Completion sa mga report gikan sa Barangay Tanods tungod kini sa nahitabo nga dunay reports nga gibalik-balik lang unya uwahi kini mohatag sa mga report.

“I am very particular of the submission of the report,” ingon ni Lao.

Sa pagka karon walay ika rekomendar si Lao sa paghatag og dugang nga honorarium alang sa uban pang mga barangays tanod.

“Naa man gud uban mga tanods motrabaho lang because of incentives, because priority aning akong mga gipahibawo. Ang Barangay Bonbon ug Taptap lang mao ang una mi responde sa atong panawagan,” butyag ni Lao.

Dugang pa niya nga adunay uban sa mga tanod nga gihimo lang kini isip ikaduha nga prayoridad nga trabaho.

Motrabaho lang kini inig ka gabii apan inig ka buntag aduna pa kini lain nga giasikaso hinungdan mabiyaan ang obligasyon sulod sa usa ka barangay.