40 kilos nga mga pagi nasakmit sa DVMF
Nakasakmit ang Department of Veterinary Medicine and Fisheries (DVMF) sa Cebu City og kapin 40 ka kilo sa pagi sulod lang sa 24 ka oras.
Ang mokabat 42 ka kilo sa ilegal nga pagdakop sa pagi, nasakmit sa Pasil Fish Port.
Matod ni Dr. Alice Utlang, DVMF head, nga wala nila maisyuhi og confiscation certificate ang nasakmit sa ilang sakop nga 25-30 ka kilo sa pagi niadtong Biyernes sa hapon.
Kini tungod dihang nakakita sa ilang personnel ang naninda niini, nikaratil og dagan ug wala na nila maabti.
Apan kagahapon sa kaadlawon naisyuhan gyud si Virginia Sanggotan ug Vanessa Llanto dihang nasakpan kini nga naninda niini.
Kalapasan sa executive order 012-2016 ni Mayor Tomas Osmeña ang pagdakop, pagpamaligya sa stingray o pagi.
Base sa pakisusi sa DVMF gikan sa lungsod sa Bantayan ang mga pagi.
P1,000 matag kilo ang mul- ta kon masakpan nga naninda niini.
“Ang atong hangyo kanang sa kada lungsod o kada lugar naa man tay bantay dagat o fishery sector, magpahimango ug kanunay nga i-implement gyud nga dili gyud na siya pwede kuhaon sa dagat ug ibaligya,” matod ni Utlang.
Dugang niini nga plano niya nga tapukon ang mga fish vendor sa dakbayan sa Sugbo aron mapahibawo sila kabahin niini.
Sa pagkakaron irekomendar nila ngadto sa ordinansahon nga isang-at ni Konsehal Edu Rama sa konseho nga silotan usab og apil ang magluto, maninda ug mokaon og pagi.