‘Pyramiding’ ang estilo sa Tokhang sa Station 3 sa Lapu-Lapu police

Susama og estilo sa pyramiding scheme ang gihimo sa Police Station 3, Lapu-Lapu City Police Office (LLCPO) sa ilang gipatuman nga Tokhang ngadto sa mga drug personality sa ilang hurisdiksiyon.

Matod pa ni PCI. Junel Caadlawon, hepe sa Station 3, nga gikinahanglan nga mo-recruit ang kadtong drug personality nga adunay susamang bisyo aron kumbinsihon nga mo-surrender sa kapulisan.

“Morag pyramid scheme ba, nga mo-convince sila (drug personality) niadtong ilang gikuhaan ug gibaligyaan sa drugs kay sila may nakaila,” pasabot ni Caadlawon sa dihang nahinabi sa Superbalita Cebu.

Wa makontento si Caadlawon nga mobase lang diha sa ilang talaan sa mga drug personality sanglit siya nasayod nga aduna pay mga galamay ang ilang target nga wa pa nila masayri.

“Kay kon atong adtuon sa balay (drug personality) intimidating kaayo ba, uwaw pud baya. Mao nga atong invite-ton diri sa opisina,” dason sa opisyal.

Niadtong Miyerkules gisugdan sa Station 3 ang pagpatuman og balik sa Tokhang apan inay nga mosuroy ngadto sa balay sa drug personality ilang gidapit sa ilang buhatan ug gipakuyog ang sakop sa ilang pamilya.

Asoy sa opisyal nga adunay sakop sa pamilya sa ilang gi-Tokhang nga mibasol sa mga silingan kay nagpataka og hatag sa pangalan sa ilang amahan nga giingong nalambigit sa drugas kay dili sila katuo nga nalambigit kini sa ilegal nga binuhatan.

Apan atubangan sa pulis nitug-an ang maong lalake (pangalan gipugngan) ngadto sa iyang pamilya nga upat na ka tuig nga siya namaligya og shabu.

Human sa pagpatahan, pangayoan ang ilang target og laing pangalan sa ilang nailhan nga drug personality aron kombinsihon sab sa pagpa-surrender.

“Akong tan-awon kon growing ba ni pyramiding namo,” panapos ni Caadlawon.