Taliwala sa mga kontrobersiya, mga Sugbuanon misuporta sa DOH: Dr. Catan
Mga Sugbuanon gihulagway sa Provincial Health Office (PHO) nga pabiling nisuporta sa mga programa sa panglawas sa kagamhanan.
Kini taliwala sa nitumaw nga kahadlok ug paglikay na sa pipila ka mga ginikanan sa Luzon ug Mindanao sa mga libre nga health care program sa gobiyerno, nunot sa kontrobersiya sa Dengvaxia.
Gikataho nga dunay mga ginikanan sa Luzon ug Mindanao area ang nitagam ug dili na mosalig sa bisan unsa nga health care program sa gobiyerno, bisan ug kini libre.
Apan sigun ni Provincial Health Officer Dr. Rene Catan, dili ra ingun niini kanegatibo ang reaksiyon sa mga Sugbuanon.
Matod niya, importante gihapon nga mahatagan og igong impormasyon sa katawhan labot sa mga programa sa panlawas aron nga mapahimuslan nila kini.
Lakip sa mga libreng medical services nga gitanyag sa local health units sa Sugbo ang maternal ug child health, pag-detect ug pagtambal sa tubercolosis, libreng immunization program ug uban pa.
Nagpadayon pa karon ang profiling sa 162 mil ka mga bata sa probinsiya nga nahatagan sa Dengvaxia.
Si DOH 7 Director Jaime Bernadas niingon dili angay mahadlok ang publiko sa ubang programa sa ilang ahensiya, ilabi na sa ilang immunization program sanglit nasuwayan na kini sa miaging katuigan.
Ang local health workers maoy gipatabang sa pagpakatap sa mga impormasyon mahitungod sa nagkadaiyang health program.