TNVS gitinguha nga PUN-AN
Gikan sa 45,000 nga gihatag sa gobiyerno, buot sa Transport Network Company nga himuong 75,000 ka mga unit ang magdagan sa tibuok Pilipinas.
Sa pagkakaron supak sako sa timing sa maong lakang kay daghang kinahanglan unahon og atiman sa atong gobyerno sa issue sa transportasyon. Klarong policy sa TNVS maoy pandayon ug timbangon unta sa ratio sa road area ug sa mga awto matag lugar . Ikonsidera sab ang mga mawagtangag panginabuhi an kon kining lakang ipadayon. - Juniño Padilla
Uyon ko ani kay kulang gyud kaayo ang transportasyon labi na kon mag rush hour. Maayo ni nga klase sa transportasyon kay dili mamili og pasahero. - Romeo Marantal
Dili uyon. First, makadugang sa traffic labi na diri sa Metro Cebu. Second, luoy sad ang mga taxi drivers kay ang ubang pasahero mas mopili man og Grab car ug Uber kay mas laysho man sila but at the end hagit pud ni sa ubang mga taxi operators ug uban pang transport operators nga mas panindutan pa ilang serbisyo. - Aires Atuel
Dili ko uyon sa “supply cap” o paglimit sa magdagan nga TNVS units tungod kay midaghan man usab ang demand sa mga pasahero. Hagit usab kini sa ubang transport network companies nga palambuon ang ilang serbisyo tungod kay hugot na ang kompetisyon. - Gorion Rhandi
Dili malalis nga ang pag alagad sa Grab/ Uber dako kaayo ang kalainan kon itandi sa taxi kay pipila sa mga sumasasakay ang wa nakontento sa taxi, kay ang mga driver manigarilyo, baho ang unit, gubaon, samtang ang sa uber/ grab, limpyo ug bag o ang units. Labing maayo nga tun-an na lang sa LTFRB ug angayan na tingali I-phase out o minusan ang franchise sa mga taxi ug hulipan na sa uber/grab. - Clarence Paul Oaminal
Ang Sugbo base sa survey adunay dili mominos 600,000 ka mga units sa sakyanan ang nagbahis sa kadalanan. Ang atong karsada nagpabilin gihapon kining hagip-ot. Alang nako dili na kinahanglan nga magdungag pa og dugang sakyanan sama ining mga Grab o Uber gumikan kay usa kini nga makahatag og dugang gidaghanon sa nagtipun-og nga mga sakyanan sa Sugbo nga maoy nakaingon sa pagpasaka sa dugang kahuot sa trapiko. - Tantan Sabalones
Uyon aron makabaton og maayong desisyon niini ang LTFRB kay ako nagtuo sa kamapuslanon sa konsepto sa “ride sharing” pinaagi sa mga TNVS. Angay usab timbang-timbangon ang epekto niini sa trapiko kon magpaturagas lang pud sila sa paghatag og pagtugot nga pun-an ang mga unit nga mahimong makadaot usab sa mga taxi driver ug operators kinsa dako usab og puhunan sa ilang mga prangkisa. - Higalang Eli Espina