Sa hinayhinay

Sa laing greyhound operation sa Philippine Drug Enforcement Agency (PDEA) 7 ug Cebu Provincial Detention and Rehabilitation Center (CPDRC), lain na sab nga mga pakete sa drugas ang napalgan sa mga awtoridad, gawas sa ubang mga kontrabando. Pila na man ka mga raid sulod sa pasilidad nga nakalusot ang drugas? Kaniadto pa kining mao nga problema nga giatubang sa mga bilanggoan dinhi sa nasod, apil na ning pasilidad nga iya sa lalawigan sa Sugbo.

Kon naa kining mao nga problema sa CPDRC, seguradong mas dako ang giatubang nga suliran sa ubang mga bilanggoan sa kagamhanan, nga gidumala sa BJMP.

Lisod wagtangon ang kurapsyon sud sa mga bilanggoan kay nakagamot na kini og maayo, sama sa usa ka kahoy nga nakalipang na og maayo nga lisod nang lukahon.

Apan bisan kon nakagamot na ang usa ka suliran, hinayhinay kining mapatay sa kanunay nga pagputol o pagpung-ol sa mga sanga ug gamot. Kining suliran sa drugas sa mga pasilidad, hinayhinay ra sab kining mawagtang pinaagi sa subsub nga kampanya hangtod nga maglisod na ang mga tigpayuhot sa pagpalusot.

Gikinahanglan usab nga panid-an kinsa ang mga kurakot nga dali rang matintal sa kwarta ug palambuon kanunay ang sistema sa seguridad pinaagi sa pag-usab usab sa sistema sa pagbantay.

Bug-at usab nga silot ang gikinahanglan di kay kutob ra sa hilothilot ug ginagmay nga silot. Pananglitan, bisan sa unang kalapasan, pahamtangan na og taas nga suspension ug sa ikaduha taktakon na.

Gikinahanglan usab nga dunay puthaw nga mga kamot ang modumala ning mao nga pasilidad, apan dunay kasingkasing nga mopalambo sa kinabuhi sa mga piniriso pinaagi sa paghatag kanila og alternatibong panginabuhian bisan naa sila sulod sa bilanggoan.