Fraternity war
Gidudahan nga ang nahitabong pagpamusil sa duha ka mga batan-on sa Nivel Hills, Busay niadtong Huwebes sa gabii adunay kalambigitan sa away sa duha ka fraternities nga mao ang Alpha Kappa Rho (Akrho) ug Tau Gamma Phi. Sa kadaghan sa mga fraternities dinhi sa Pilipinas, kining duha lang ang kanunay magkabingkil ug daghan na sa ilang mga miyembro ang nangamatay, nanga-angol og nanga-priso.
Ang mga nangamatay gi-ila nga sila Benedicto Tabarno Jr., 19, ug si Prierce Ulivas, 15, puro taga barangay Busay ug pulos mga miyembro sa Tau Gamma Phi (Triskelions). Ang duha naglingkod sa eskinita doul sa usa ka tindahan atubang sa barangay hall sa dihang girapido sila sa mga armadong mga tawo nga nagmotor gamit ang 9 mm pistol. Patay diha-diha ang duha. Aduna pay usa sa babaye nga milabay lang ang natapsingan. Buhi hinuon siya.
Matod pa sa mga imbestigador ug mismo ni Busay barangay Captain Ami Lopez nga posibling ‘resbak’ o bawos sa taga Akrho ang hitabo. Kay niadtong miaging Domingo atol sa pista sa Nivel, ang mga sakop sa Tau Gamma adunay gika-ingkuwentro nga mga sakop sa Akrho sulod sa diskohan. Posibleng gikan sa laing lugar ang mga sakop sa Akrho kay kon taga diha ra sa Nivel, dili mahitabo nga magka-engkuwentro ang duha ka grupo kay kaila ug mga paryente ra.
Ambot lagi og nganong kanunay magka-engkuwentro ang maong grupo. Dili lamang dinhi sa Sugbo bisan sa laing lugar. Personalan ug dumot gyud ning ila?
Daghan unta kini silang propisyonal nga mga miyembro. Ang Tau Gamma Phi natukod niadtong 1968 sa University of the Philippines samtang ang Akrho nga naila usab nga Skreptons natukod sa 1973 sa University of Santo Tomas.
Samtang ang ubang mga fraternities mo-recruit lang og college students ug propisyonal, ang uban gong nga fraternities mang-recruit og mga estambay, mga menor de edad ug out of school youth. Mao nga daghan kaayo ang mga badlungon sa ilang grupo kay wala sila masayod kon unsa kining ilang gisudlan. Ang fraternity ma-aan na og gang. Maayo unta og masulbad ni kay aron way daghan ma-angin.