Health is wealth
Nag-chat mi sa akong usa ka higala nga banker. Kaniadto gusto siyang mopabarog og biseklita, apan nahilom ra. Akong nidiskobrehan ang rason dihang ako siyang gipangutana kon kumusta na ang iyang plano sa pagbiseklita. Nakurat ko sa iyang tubag: “para pamilya ra gyud ni ang akong budget.”
Na shock ko sa iyang tubag. Daghan diay sa mga tawo nga wa makasabot kon unsa ang biseklita. Daghan ang nagtuo nga ang biseklita usa lang ka matang sa transportasyon ug gamiton alang sa lingawlingaw. Way lalis, ang biseklita usa ka kalingawan, gawas niadtong mangapil og sports competition. Apan matag higayon nga ikaw motindak sa biseklita, nagkinahanglan ka og kusog. Matag buga nimo og kusog, mangalihok ang tanang parte sa imong lawas, mangasunog ang calorie ug fats. Sa pagkahitabo niini, mohatag kini og maayong panglawas nimo. Ang maayong panglawas makaayo kanimo ug sa imong pamilya.
Naay ginaingon nga health is wealth. Bahandi ang maayong panglawas. Kay kon ikaw masakit, mas dako ni og gasto. Pananglitan masakit ka, pila kaha ka libo ka pesos ang gastuhon? Samtang sa biseklita, makausa ka ra mogasto. Kon ikaw mobiseklita, huna-hunaa nga alang kini sa imong kaayuhan ug sa imong pamilya sa kinatibuk-an.
Kaluwasan
Kon tan-awon og maayo ang statistics sa mga aksidente sa karsada, gamay ra kaayo ang naglambigit sa biseklita kon itandi sa motorized nga mga sakyanan, sama sa motorsiklo, scooter, awto ug truck. Sa ato pa, imahinasyon ra nang kuyaw ang biseklita. Mas kuyaw ang nagmotor ug nag-scooter kay kusog kining managan. Mas paspas ang dagan, mas deadly ang impact kon mabangga.
Sa pagsikad, pag-amping kanunay. Magpadaplin sa karsada ug maglinglingi usab aron makakita sa nagsunod. Ayaw pagpaapupa sa dagkong mga trak, labina kon naa sa highway. Labaw sa tanan, sul-ob kanunay og helmet kay alang kini sa imong kaluwasan.
Sa gabii, hinumdomi ang pagbutang og blinker sa imong biseklita aron makita ka sa nagsunod ug kasugat nimo nga mga sakyanan.
Palit na
Kon mahadlok ka sa aksidente, adto ka mosikad sa hilit nga mga dapit, sama sa kabukiran. Palit og mountain bike. Ayaw pagpadala sa kahadlok nga dunay mahitabong aksidente. Natural lang ang malamba. Aron makalikay ka, mas maayong mag-amping sa pagtindak. Ang mga pangos ug bun-og kabahin na sa bisan unsa nga sports.
Tungod kay natumba ka, molikay ka na sa lang paglingaw sa imong kaugalingon? Kon ganahan kang motindak, uban sa panon kay mas luwas ka. Ayaw kahadlok kay ang naa sa imong imahinasyon wa diay basehanan. Busa, palit na.