Forgiveness

Samtang gisulod ko ang akong mga biste sa dakong travelling bag, nagsige sab kog hilak. Sakit kaayo ang akong dughan. Wa gyud ko magtuo nga makahimo si Marlene sa pagtraydor nako. “T-Te.”

Gigakos ko ni Marlene. Naghilak siya. Apan giwakli ko siya.

“Baga kag nawong, Marlene! Giilog mo si Rowan nako! Wa ko nimo ilhang igsuon!”

Hapit ko na lang lamparuhon ang akong manghod. Gitukmod ko siyag kusog. Natikay-ang siya sa sawog sa akong kuwarto. Nagpamahid ko sa akong mga luha nga migawas sa akong kuwarto nga nagsalig-ay sa akong travelling bag nga puno sa akong mga biste ug sa uban pa nakong mga gamit. Nakadesisyon ko nga mobiya sa among balay.

“Kinahanglan ba gyud nga mobalhin kag puyo sa imong Tiyo, Lorena?”

Gisugat ko ni Mama. Nagpanglingo si Papa. Naghilak si Mama nga mihawid nako. Apan nausa na gyud ang akong hunahuna. Gikasilagan ko ang akong igsuon.

“Nakahibawo na kamo si Papa sa hinungdan, Ma. Wa koy kalinaw dinhi kay kauban ko sa pagpuyo si Marlene.” Miginhawa ko pag-ayo aron mawala ang kahuot sa akong dughan.

Wa na magtingog si Mama. Migakos si Mama kang Papa. Mihilak siya pag-ayo.

“Kon mao gyud nay imong gusto, Lorena, kami gihapon si Mama nimo ang mogasto sa imong pag-eskuwela. Magduawan mi nimo didto sa ilang Donato.

Igsuon ni Papa si Uncle Donato. Adto na ko mopuyo sa ilang balay sa Lahug. Gisultihan ko na siya ug ang iyang asawa nga si Tiya Tessie. Nakasabot sila sa akong gibati. Wa sila magduha-duha sa pagpapuyo nako sa ilang balay. Duna silay bugtong anak nga babaye sab. Vives mi si Carmen. Sa kuwarto ni Carmen

ko maghigdaan. Parehas mig edad ug parehas sab ming graduating na sa tagsa-tagsa ka kurso nga among gikuha. Usa ra gani ka university ang among gitunghaan.

Gitando ko si Papa dayon kong biya nila. Sa wa pa ko mogawas sa among gate, gitan-aw ko sila si Mama ug Papa nga misunod nako apan nanghunong sa gawas sa pultahan sa among sala. Nagpamahid si Mama sa iyang mga luha samtang nagtan-aw nako. Si Papa morag nag-alam-alam kang Mama.

Naluoy ko sa akong mga ginikanan. Unya nagdagan si Marlene nga miduol nako. (SUMPAYAN)