Love on wheels

Nagkaila sila si Xander ug Romina pinaagi sa Facebook usa ka gabii niana samtang nag-internet si Xander ginamit ang iyang ‘laptop’ nga diha sa ibabaw sa iyang ‘study desk’ sulod sa iyang kuwarto. Gibuksan niya ang iyang ‘gmail’ ug gibasa ang mga mensahe gikan sa iyang mga FB friend. Dihay usa ka ‘message’ nag-ingon, “Romina Castro wants to be friends on Facebook.” Iyang gi-klik ang message ug miguwa ang busto nga litrato ni Romina. De-kolor ang litrato ug nadani dayon si Xander sa katahom ni Romina. Pution ang pamanit ni Romina, itom ang buhok nga kutob ra sa abaga ang gitas-on. Gi-klik niya ang ‘Confirm’ ubos sa litrato. Ang FB mitubag, “You’re now friends with Romina Castro.”

Hapit kada gabii nag-chat sila sa FB. Nahibaw-an ni Xander nga si Romina 25 anyos nga dalaga ug nagtudlo sa kindergarten sa usa ka pribadong eskuylahan sa dakbayan sa Talisay, Cebu. Gitug-anan pod niya si Romina nga siya si Xander Villar, usa ka CPA nga nag-alagad sa ‘accounting office’ ni Romeo Villar, iyang uyoan nga CPA sab. Ulitawo pa siya ug 27 anyos. Paglabay sa daghang mga gabii gitug-anan ni Xander si Romina sa gihambin niyang pagbati ngadto sa dalaga. “I feel in love with you, Mina! I love you! Will you love me, too?” mensahe ni Xander sa iyang ‘wall.’ Ang ‘reply’ ni Romina kay ‘imoje’ nga nagkatawa.

Nag-type si Xander sa keyboard: “Di ni komedya ako, Mina. Seryuso ko nga pagka tawo!”

Mibawos si Romina, “Wa pa gani ta magkita sa person-

al, ‘I love you’ ka man dayon! Magkita ta sa personal aron makita mo kon unsa ang tinuod kong pagka tawo. Bisitai ko sa among balay sa Talisay.” Ug gitug-anan ni Romina si Xander sa eksaktong adres sa iyang balay nga nahimutang sa Dumlog,

“Sige, moanha ko diha sa inyong balay karong Dominggo sa hapon kay day-off nako. OK?”.

Mitubag si Romina, “OK kaayo kay wa may klase. I’ll be waiting!”

Nianang pagka Dominggo sa alas kuwatro sa hapon didto hunong ang pick-up nga gisakyan ni Xander tungod sa geyt sa balay nilang Romina. Ang balay gilibutan sa paril nga kongkreto. Mikanaog ang drayber ug nangatahuran. Miduol ang usa batan-ong lalake.

“Unsay ato, Sir?” sukna sa batan-ong lalake.

“Kining… naa si Romina? Ingna siya nga nia si Xander,” tubag sa drayber nga pustorawo.

Dali nga misulod ang batan-ong lalake sa balay. Wa dantig lima ka minutos mibalik kini ug miingon, “Pasudlon ka ni Ma’m, Sir.”

Milakang paingon sa balay ang drayber. Diha sa pultahan

nangatahuran siya, “Maayong hapon, Ma’m! Ikaw si Romina?” sa drayber ngadto sa usa batan-ong babaye nga naglingkod sa sopa.

“Dili. Si Merlina ko, ig-agaw ko niya. Tua siya sa kusina,” sa babaye, dayon misangpit, “Day Mina, niay nangita nimo!”

Miguwa gikan sa kusina ang usa ka maanyag nga dalaga nga naglingkod sa ‘wheelchair.’

Mitutok siya sa tawo nga nagtindog sa ganghaan sa balay. Dili man si Xander nga maoy iyang gipaabot! Pamilyar siya sa hitsura ni Xander sa FB.

“Good afternoon, Sir! What

can I do for you?” ni Romina. “Ako si Danny Villar. Ig-agaw ko ni Xander?” matod sa drayber.

“Hain man diay siya?” ni Romina.

“Tua sa sakyanan. Isa, kay akong kuhaon.” Mitalikod si Danny aron pagkuha kang Xander.

Gi-alalayan ni Danny sa pagkawas sa sakyanan si Xander. Unya milipot siya sa luyo sa pick-up ug gikanaog ang usa ka silyang may ligid. Dayon gipalingkod niya si Xander sa ‘wheelchair’ ug gitulod paingon sa balay nilang Romina.

“Hai, Min! Nagkita na gyud ta sa personal, Kumusta ka?” ni Xander nga nagpahiyom dihang nakasulod na sila si Danny sa sala.

“Okey ra ko,” ni Romina. “Wa ko magdahom nga pareho diay tang duha, consigned to the wheels. Hihihi!”

“So, compatible ta, di ba?” ni Xander nga mibahikhik pod.

Human sa ilang paghimamatay, gitawag ni Romina si Merlina aron mag-andam og esnak para sa mga bisita. (KATAPUSAN)