Wala palupig sa pagsuway
Ako si Zenaida Zurita Muana, 54, molupyo sa Sitio Eastern, Barangay Poblacion, lungsod sa Poro, isla sa Camotes sa probinsiya sa Sugbo.
Usa ako ka balo ug adunay tulo ka mga anak, diin duha kanila nakahuman na sa kolehiyo samtang ang ikatulo naa pa sa elementarya.
Niadtong buhi pa ang akong bana, sa iyahang sweldo ra gyud kami nagsalig alang sa among inadlaw-adlaw nga panginahanglanon. Sa pagkawala niya, naglisod gyod ko ug nabalaka kon unsaon paghatag sa mga pangihanglanon sa akong mga anak.
Tungod sa kalisod sa among kahimtang, nakahunahuna ko nga mosulod pagka-kusinera sa karenderya sa akong ig-agaw.
Bisan gamay ra ang akong suweldo nakasugakod ra gihapon mi sa akong mga anak ug nakatigom ko og gamay nga kwarta pangsugod og kaugalingong negosyo.
Tuig 2012, sa gamay nga kapital nga P3,000 nagsugod ko og akong gamay nga carenderia. Usa ka adlaw, niana, anaay mga taga-RAFI Micro-finance, Inc. nga trust
staff nga nangaon sa akong karenderya og ila akong gipasabot sa ilang programa nga
micro-finance. Nagduhaduha ko pag-una sa pag apil kay basin dili ko makabayad sa akong mga responsibilidad.
Apan bisan pa sa akong panagana, niapil gihapon ko kay sa akong hunahuna alang man usab kadto sa akong mga anak. P5,000 ang akong unang hulam nga ako dayong gidapat sa akong karenderya.
Sa sige nako og loan, ako gyung gibutang sa hunahuna nga ang kwarta alang sa negosyo ug dili idapat sa ubang butang kay mabarangkarota gyud ang akong negosyo.
Sa kalisod sa among kinabuhi, ako sab gyud nga giampo ang tanan sa Ginoo kay sa tanang naagian ug maagian pa namo nga kalisod kahibawo ako nga naa ra gyud Siya nga magagiya kanamo.
Tuod man, bunga sa kakugi ug giya sa Diyos, dako ang nahimong kausaban sa among kahimtang. Nakapaeskuyla ako sa akong mga anak ug nakapaayo sa among balay pinaagi sa housing loan.
Ang akong ikatambag sa sama nakong nagnegosyo mao nga kanunay maningkamot, dili magtinapolan, kay ang kakugi maoy makalingkawas kanato sa kalisod.
Kanunay sab nga mag-ampo sa Ginoo, gahinan Siya ug oras ug ang pamilya aron ka madasig bisan unsa pang pagsulay ang imong maagian.