GIDAWAT ATUBANGAN SA DIYOS
Nabalaka si John Edward Pacres, 23, nga dili makapasar sa Civil Engineer Licensure Examination niadtong 2016 sa pagtuo nga daghan siya og sayop nga mga tubag.
Apan ang iyang kabalaka nga nabati human sa duha ka adlaw nga eksaminasyon, nahulipan og kalipay.
Nadungog niya ang matamis nga “I love you” gikan sa babaye nga gipadayagan sa iyang gugma, si Emily Abella.
Kini atol sa “Peace Be With You” nga bahin sa misa sa Basilica Minore del Santo Niño, pagka hapon human sa board exam, niadtong Nobiyembre 13, 2016.
“Pag “Peace be with you” nangutana ko niya, Unsa man? Nitubag siya “Kita na.” Happy kaayo ko. Abot gud sa dunggan akong ngisi,” saysay ni John.
Doble ang iyang kalipay kay nakapasar usab siya sa licensure exam.
Si John ug Emily unang nagkakita sa Kasadya sa South Road Properties, dakbayan sa Sugbo niadtong Enero 2015.
Nagkaila sila pinaagi sa klasmeyt nga babaye ni John nga si Leika Marie Digal, nga suod nga higala ni Emily.
Sa kasaulogan sa ilang unang anibersaryo niadtong Nobiyembre 13, 2017, si John ni-propose ni Emily.
Ang duha nagbinayloay og
“Yes, I do” ug nanumpa nga mag-inunongay sa usag-usa atubangan ni Padre Irwin Pilario niadtong Enero 6, 2018 sa Sto. Tomas de Villanueva Parish, Barangay Poblacion Pardo, siyudad sa Sugbo. /