GOODLUCK JERWIN
Sagubangon na ni Filipino Jerwin Ancajas ang labing una niyang away sa Amerika karong adlawa sa American Bank Center sa Corpus Christi, Texas diin depensaan niya ang iyang International Boxing Federation (IBF) super flyweight title batok kang Mexican Israel Gonzalez.
Sa official weigh-in kagahapon, si Ancajas mitimbang og
114 ¾ pounds sa 115-pound limit samtang si Gonzales mitali og 114 pounds.
Si Ancajas, kinsa modepensa sa iyang titulo sa ikaupat nga higayon, madasigon nga mokulit og impresibong kadaugan sa Amerika sama sa iyang gihimo sa nag-una niyang tulo ka challengers.
Sa premiro niyang depensa, gipaundang ni Ancajas sa 8th round si Jose Rodriguez niadtong Enero sa miaging tuig.
Sa ikaduha niyang depensa niadtong Hulyo sa miaging tuig sa Brisbane, Australia, gipaundang sab ni Ancajas sa 7th round si Teiru Kinoshita.
Samtang sa iyang ikatulong depensa sa Belfast, USA, gipaundang gihapon ni Ancajas si Jamie Conlan sa 6th round.
Ang maong impresibong mga kadaugan ni Ancajas nakapabilin kang Top Rank boss Bob Arum, promoter ni boxing
legend Manny Pacquiao. Gumikan niini, gipapirma ni Arum og unom ka mga away nga kontrata si Ancajas, kinsa sakop sa MP Promotions nga gipanag-iya ni Pacquiao.
Matod pa ni Arum nga giyahan niya si Ancajas sama sa iyang paggiya kang Pacquiao.
Apan mibahad si Gonzalez nga iyang putlon ang sunodsunod nga himaya ni Ancajas.
“We didn’t come to play. We came to take that title from Ancjas. And I promised Mexico to take that title,” matod ni Gonzalez sa interbyu sa www.spin.ph.
Si Ancajas wala nagpatay-og sa bahad ni Gonzalez.
Igo rang mipabuhagay si Ancajas nga naghinamhinam na siyang makigbinukbokay kang Gonzalez ibabaw sa ring.
Ang 26 anyos nga si Ancajas naggunit og 28-1-1, 10KOs nga rekord samtang si Gonzalez naghupot og 21-1, 8KOs nga baraha.