P2.6M SHABU NASAKMIT SA PDEA 7
Gikatahapang usa sa mga drug lord sa dakbayan sa Sugbo nakuhaag P2.6 milyunes nga balor sa shabu dihang nadakpan sa mga ahente sa Philippine Drug Enforcement Agency (PDEA) 7 niadtong Huwebes sa alas 3 sa hapon sa may Lake Danao Resort, Brgy. Union, lungsod sa San Francisco, Isla sa Camotes.
Si Alfiel C. Chu, 28, minyo, taga Pardo, dakbayan sa Sugbo, nakuhaag 530 gramos nga shabu nga mobalor og P2.6 milyunes.
Lakip sa nasikop ang igagaw ni Alfiel nga si James Chu, kinsa nakuhaag usa ka dakong putos sa shabu; Mark Vincent Jorquia ug Ruben Roy Dabatos, pulos nakuhaag tagsa ka dagkong putos sa shabu.
Si Leah Albiar, tigpamaba sa PDEA 7, nibutyag nga ang ilang mga ahente nagdala og warrant of arrest batok kang Alfiel may kalambihitan sa pagpamaligya og drugas niadtong Hulyo 10, 2015.
Dihang natultulan sa mga ahente sa PDEA 7 si Chu, didto kini sa resort sa nahisgutang lugar samtang ang iyang mga kauban nga midagan atol sa operation nangadakpan.
Si Albiar niingon nga gipaubos pa nila sa tactical interrogation si Chu, kinsa wa pa motugan kinsay source niini sa shabu.
Si Chu, nga nahinabi nahinabi sa Superbalita nanghimakak sa mga pasangil batok kaniya.
Matod niya nga wa siyay kalambigitan sa negusyo sa drugas kay naamong siya sa iyang amahan nga maoy nagnegosyog shabu kaniadto ug naa sa bilanggoan.
Naduhig lang siya sa isyu sa drugas kay napriso iyang amahan ingon man iyang igsuon nga nakuhaag usa ka kilo niadtong 2015.
Gipadayag niya nga ang iyang abogado na maoy iyang patubagon sa tanang akusasyon batok kaniya.
Human siya gilakip sa kaso niadtong 2015, nibiya siya sa dakbayan sa Sugbo ug nipuyo sa San Francisco, Camotes uban sa iyang pamilya.
Matod niya nga duna siyay farm sa mga manok pangsabong, diin siya nagkuha sa iyang income.
Duna siyay 100 ka mga manok pang sabong nga gi-breeding ang presyo matag usa tag P5,000 samtang iyang ibaligya sa ubang kustomer sa Manila.
Samtang sa laing bahin, labandera nakuhaag binultong shabu ug drug paraphernalia dihang gironda sa PDEA 7 ang iyang balay sa miaging hapon sa Brgy.Suba, dakbayan sa Sugbo.
Si Annabel Solis, 50, biyuda, gironda pinasikad sa search warrant sa pagpadagan niinig drug den sa lugar.
Mi-angkon siya sa kremin sanglit wa siyay panginabuhi human siya masakit samtang patay na ang iyang bana kinsa napreso sa drugas. /