MAESTRA PATAY, 14 ANGOL SA BANGGA
MULTICAB ‘MI-COUNTERFLOW,’ MIBANGGA SA TRAK
Usa ka magtutudlo namatay samtang 14 ang nangaangol human nagbangga ang usa ka multicab nga depasaheroan ug usa ka cargo truck sa Upper Mainit, Dakbayan sa Naga, kagahapon pasado alas 7 sa buntag.
Si P02 Nilo Dacles, imbestigador sa traffic section sa Naga Police Station nga nahinabi sa Superbalita Cebu, niila sa namatay nga si Hilda Allera, 32, magtutudlo sa Pangdan Elementary School.
Ang aksidente naglambigit sa usa ka multicab (plate no. GWJ-102) nga gimaniho ni Rogelio Paran, 61, taga Barangay Uling, ug cargo
truck (plate no RMW 964) nga gimaniho ni Elieser Tapdasan, taga Guindaruhan, lungsod sa Minglanilla.
Laing nalambigit mao ang usa ka usa ka pribadong sakyanan nga Navarra nga gimaniho ni Cherry Ann Alonzo, taga barangay Tunghaan, lungsod sa Minglanilla.
Base sa pasiunang imbestigasyon sa kapulisan, ang multicab paingon sa Barangay Uling, samtang ang cargo truck paingon sa Poblacion, Naga.
Atubangan sa multicab mao ang usa ka traysikol ug ang luyo mao ang Navarra.
Sa dihang mi-overtake ang multicab sa traysikol, nilapas na kini sa pikas lane nga didto usab nagsubay ang cargo truck.
Mao kini ang hinungdan nga sila nagkabangga ug nadumbol usab sa Navarra ang luyo sa multicab.
“Ang driver side gyud maoy nagkaigo, Sir. Pero ang multicab maoy grabeng damage. Pero ang cargo truck wala ma grabehi, astang ang duha ka driver sa Navarra,” matod ni Dacles.
Si Paran, drayber sa multicab, giingong usa sa nagrabehan samtang si Allera namatay anaa sa luyong bahin sa sakyanan naglingkod.
Si Allera gideklarar nga patay nang niabot sa tambalanan. /