68 ka mga tawo ang ‘nangalanag’

Miabot og 68 ka mga tawo, kasagaran mga tinun-ang Muslim, ang gidala sa duha ka pribadong mga tambalanan sa dakbayan sa Sugbo niadtong Huwebes sa gabii human makasinati og pagpanakit sa ilang tiyan, nagsuka ug kalibang.

Ang 68, gilangkuban sa mga estudyante, ginikanan ug mga magtutudlo, mga partisipante sa Second National Musabaqah Skills Exhibition Convention nga gipasiugdahan sa Department of Education gikan sa Pebrero 5 hangtod kagahapon nga gipahigayon sa Ecotech Center sa Sudlon, Barangay Lahug ning siyudad.

Ang DepEd nisusi na kon unsay nakaingon sa ilang pagsakit.

Si Nagiel Bañacia, pangu sa Cebu City Disaster Risk Reduction and Management Office, niingon ang unang admissions nagsugod alas 6:30 sa gabii niadtong Huwebes.

Kasagaran sa reklamo sa mga partisipante kay sakit ang ilang tiyan, nagkalibang ug nagsuka.

Si Bañacia namahayag nga sa 68, 61 niini ang gidala sa Perpetual Succour Hospital samtang ang pito sa Cebu Doctors Hospital University.

Si DepEd 7 regional director Juliet Jeruta namahayag nga una ning hitabo nga dunay nadala sa ospital.

Siya nipasalig nga abagahon sa ilang buhatan ang bayranan sa mga ospital.

Si Jeruta niangkon nga maglisod na sila pagpaubos sa laboratoryo sa gikaon sa mga partisipante sanglit na-dispose na kini ug maglisod na sila pagkuha og sample.