‘Tuman Cebu, Pwede Kaayo’ video gilusad
Edukasyon kabahin sa responsabli nga pagtuman sa mga lagda sa trapiko ug insakto nga paggamit sa kalsada ang gilusad sa Metro Cebu Development and Coordinating Board kagahapon.
Pinaagi sa “Tuman Cebu, Pwede Kaayo” nga programa, ang mga motorista ug sumasakay ang edukahon pag-obserbar sa insaktong pamatasan sa pagtuman sa mga lagda sa trapiko.
Kini nga programa sa pakigtambayayong sa Department of Transportation pinaagi sa Land Transportation Office, MCDCB ug Cebu Road Heroes.
Matod ni Peter Go, presidente sa Cebu Road Heroes, tumong sa programa nga mausa ang tanang stakeholder ug mapahinumduman nga angay buhat sa ilang bahin ang matag usa sa insaktong paggamit sa kadalanan ug lagda sa trapiko.
“If dili ta motuman ani, if dili ni nato paminawon, of course, everything will fail,” sumala ni Go sa pakighinabi sa mga tigbalita human sa launching sa programa.
Ang kalihukan gitambungan nila ni Congressmen Raul del Mar ug Gerald Anthony “Samsam” Gullas, mga mayor sa lainlaing mga local government unit, mga sakop sa nagkadaiyang transport groups ug ubang sektor nga gipahigayon sa plenary sa Eduardo Aboitiz Development Studies Center.
Si Go namahayag nga ipaagi nila sa social media ang pagpakaylap sa programa ug sa mga government center kon naay TV.
Si Evelyn Nacario-Castro, bise presidente sa Governance ug Linkages sa Ramon Aboitiz Foundation Inc., nga daghang angay nga buhaton sa suliran sa trapiko nga nahimo nang kabahin sa kalihukan matag adlaw.
“That is what we are going to do, taking the extra mile,” dugang niini.
Si Deputy Presidential Assistant Mike Pato nipasalig nga suportado sa Office of the Presidential Assistant for the Visayas ang maong lakang.
Atol sa launching, si Del Mar namulong ang pagdalidali sa mga tawo moresulta nga makalapas kini sa mga lagda sa trapiko.
“Pero bisan unsay justification, you will strictly follow rules and regulations,” dugang sa kongresista sa amihanang distrito sa siyudad sa Sugbo.