Osmeña di motabang sa City Jail karon nga walay supply sa bugas gikan sa NFA
Bisan kon wala nay bugas nga malung-ag ang Cebu City Jail, di mohatag og ayuda si Mayor Tomas Osmeña aron mapakaon ang dul-an 5,000 ka mga piniriso.
Ang bugas gikan sa National Food Authority (NFA) naganam og kagamay gumikan sa kanihit sa suplay diin ang ilang pundo nga bugas molanat nalang og pipila ka adlaw.
Ang mayor nagkanayon nga problema sa national government kon adunay pagkuwang sa suplay sa bugas sa City Jail, di sa Cebu City Government hinungdan nga sila ang angay mosulbad sa problema.
“No, that’s national government problem, not ours. Why should we come to the rescue? Let them solve their problem,” tubag ni Osmeña sa mga tigbalita kon motabang ba ang City Hall.
Ang City Government nihatag kaniadto og binuwan nga tabang sa City Jail lakip na ang paghatag og mga allowance sa mga jail officer apan gihunong kini sa mayor dihang nangayo siya og audit report sa Bureau of Jail Management and Penology (BJMP) kaniadto, apan siya gibalibaran.
Ang mayor nagtuo nga adunay korapsyon sa BJMP ug kon mohatag og ayuda ang Siyudad, gihulagway ni Osmeña nga sama ra nga nag-promote siya og korapsyon sa maong pasilidad.
Ang City Jail mokonsumo og 30 ka sakong bugas kada adlaw, diin ang BJMP maoy naghatag kanila og budget aron ibayad sa gikumpra nga bugas gikan sa NFA7.
Si Supt. Renante Rubio, warden sa City Jail, nagkanayon nga kon dili na maka-suplay ang NFA 7 sa ilang gikinahanglang bugas matag adlaw, posible nga mopalit sila og commercial rice aron aduna silay ikapakaon sa libuan ka piniriso.