Dugang 12 ka sakop sa HPG sa Lapu

Hangyuon ni Lapu-Lapu City Mayor Paz Radaza ang Police Regional Office (PRO)7 nga dugangan og sakop sa traffic police ang City Police Office aron nga ka-abagan sa pagsulbad sa nagkahuot nga trapiko sa siyudad.

Nanghinaot ang opisyal nga 12 ka sakop sa Highway Patrol Group ang idugang sa Lapu-Lapu.

Gi-angkon ni Radaza nga dili ma-ato sa kasamtangang traffic police ingon man sa mga personnel sa CTMS ang nagkagrabe nga traffic problem sa Lapu-Lapu.

“I think gikinahanglan (additional traffic police) na gyud and nag-double time ta sa procurement og (dugang) traffic light,” matod pa sa mayor.

Gihangyo sab sa opisyal si PSSupt. Romel Cabagnot nga ipaubos sa seminar ang mga

traffic enforcer pinaagi sa Traffic Enforcement Unit sa PNP aron nga mapahinumduman sa hustong pamaagi sa pagdumala sa trapiko.

Usa sa nakitang suliran nga migrabe ang kahuot ang dagan sa mga sakyanan ilabi na sa major thoroughfare sa Lapu-Lapu mao ang nagpadayon nga pagkawot sa Metropolitan Cebu Water District (MCWD) ilabi na sa barangay Ibo nga bisag lawom nga kagabhion inanay gihapon ang dagan sa mga sakyanan.

Samtang, ang manager sa MCWD Community Relations and External Affairs, Charmaine Rodriguez-Kara nipasabot nga dili gilayon matabunan ang gikubkob sa ilang kontraktor diha sa daplin sa kalsada sa higayon nga dili mahingpit ang hydro testing sa dapit ron pagsiguro nga ang gilubong nga tubo way leaking apan nipasalig sa dalion kini sa pagtapos.