Mga reporter nga nag-cover sa PNP beat ipa-background check?
Andam mohimo og background investigation ang Police Regional Office (PRO) 7 sa mga sakop sa media nga nag-cover sa mga balita sa kapulisan, kini dunay kamandoan gikan sa ilang ulohang buhatan.
Ang isyu sa background check sa mga reporter nitumaw sa kaulohan human dunay nagpailang pulis nga nanawag sa buhatan sa usa ka media outlet aron pag-check kon sa usa ka reporter kon lehitimo ba kini nag-cover sa mga balita gikan sa kapulisan.
Managlahi ang reaksiyon sa mga sakop sa media. Dunay uyon ug supak uban kabalaka sa gihimo sa Camp Crame sa pagtuo nga lahi ang katuyoan sa background investigation ilabi na nga balik na ang kapulisan sa ilang anti-drug operation.
Atol ning pagsuwat, ang organisasyon sa PNP beat sa Sugbo ug pederasyon sa beat reporters wala pa moluwat og pamahayag sa maong isyu.
Hinuon, ang PRO- 7 wala pa makadawat og kamandoan nga ila kining buhaton sa mga sakop sa media nga nag cover sa mga balita sa kapulisan apan kung moabot man kini andam nila kining buhaton.
Matod ni Supt. Reyman Tolentin nga kadto lang mga bag-ong miyembro sa media ang ilang ipaubos sa imbestigasyon apan ang ilang mga nailhan na dili na kini kinahanglanon pa.
Nipasalig si Supt. Tolentin sa mga tigbalita nga nadestino sa PRO-7 nga dili angayan nga mabalaka sanglit nasayod sila nga lahi ang media sa Sugbo itandi sa ubang bahin sa nasud nga dunay dili maayong relasyon.
“Media here in region 7 is quiet different from other area like Luzon area naa may mga peculiarities ang mga media diri and in my experience maayo man ang lakaw sa mga media and there has been no report nga naay mga derogatory information,” matod ni Supt. Reyman Tolentin.
Giila sa kapulisan sa Central Visayas ang mga tigbalita i nga kaabag sa ilang mga programa ilabi na sa pagsabwag sa impormasyon sa publiko.
Matod niya kung walay gitagoan ang usa ka tigbalita dili siya angayan nga mahadlok basta dili lang malapas ang iyang pribadong kinabuhi.
Gipasabot sa information officer sa Crame nga si Chief Supt. John Bulalacao nga ang bag-ong sakop sa media nga nag-cover sa pulis maoy gipaubos sa pakisusi kon kini lehitimong sakop sa media.