Modernization sa taxi
Dugang gasto ug kahasol na unya ang sagubangon sa mga taxi drivers ug operators ning bag-ong kamanduan karon sa Land Transportation Franchising and Regulatory Board (LTFRB) nga pabutangan na og mga gadget sama sa dashboard camera ug mobile applications ang ilang mga taxi. Ubos sa Memorandum Circular 2018-001, dili i-calibrate o i-reseal ang mga taximeters kon kini walay dashboard camera, Global Navigation Satellite System receiver, wifi ug CCTV cameras ang mga unit niini.
So, kon gusto gyud sa mga operators nga maka-avail ning pagsaka sa pletihan mapugos gyud sila sa pagtuman niini kay nahimo na man kining rekisitos aron ma-calibrate ang ilang mga taximeters.
Kini maoy tipik ug kabahin sa modernization program nga ipatuman sa administrasyon ni Presidente Rodrigo Duterte.
Nindot ni kay sama sa ubang nasod, modernized na unya ang atong mga taxi. Unya tungod sa mga camera, mahatagan na usab og igong kasiguroan ang mga pasahero. Gawas niini dali ra unya usab masakpan kining mga abusadong driver.
Si Ahmed Cuizon, ang LFTRB 7 Director mipasabot nga dunay kasabutan nga nakab-ot ang board ug ang mga operators nga mahimo ra nga way CCTV basta two-sided nga dashcam ang gamiton.
Tuyo niini mao nga mamonitor ang mga butang nga mahabilin sa pasahero ug ingon man ug simbako adunay krimen nga mahitabo sulod sa taxi.
Pero ang nakapaikag nato og maayo mao ang pagbutyag ni Cuizon nga ngadto sa ngadto ang tanang taxi, mo-operate na ipaagi sa transportation network vehicle service (TNVS), sama sa Grab ug Uber nga mogamit sa apps.
Kini maoy nindot kay matino na sa LTFRB kon kinsa ning mga taxi drivers nga mamili og pasahero kay kini maoy numero unong problema sa publiko.