Daghan ang nalipay ug naguol
Sa kasaysayan sa panakayan dinhi sa ato ang Executive Order ni Mayor Tomas Osmeña labot sa pagsilot og usa ka bulan nga pagka impound sa sakyanan nga nalambigit sa counterflow kini nikulit og iyang luna sa natad sa public opinion.
Dunay niuyon. Duna sa’y nisupak. Ang mga nisupak nagtinguha karon pagdangop sa korte aron kwestiyunon ang ligalidad sa maong kamanduan. Ang ilang reklamo nasentro sa silot nga nasukip sa maong orden ehekutibo. Sakit alang nila ang usa ka bulan nga pagka tanggong sa sakyanan kay usa ka bulan sab nga di magamit. Ako nga nakasakay ug sakyanan nga upat ang ligid nga ni-counterflow makaingon nga kulba sab.
Labi na kung motorsiklo ang sakyan. Pero kung emergency piyongan nalang sama niadtong usa ka higayon nga ni-counterflow ang taxi nga among gisakyan kay si misis nga giataki sa hubak kinahanglan nga makaabot dayon sa tambalanan.
Mao ni giingon nga depende ra gyud sa panahon ug sitwasyon. Atong huwaton unsay mahimong lintonganay ning pag-question sa mga nisupak batok sa ilang gihulagway nga di makatarunganon nga silot. Kung ang PUJ nga maoy tinubdan sa pamugas madakpan tungod kay nag counterflow ang driver usa ka bulan sab nga way kinitaan. Apan hugot sa iyang baruganan ang mayor pagpadayon sa iyang kamanduan taliwala sa mga pagsupak.
CURFEW
Sa among barangay daw gipangkilatan ang mga minor de edad unya’g kadungog nila sa siya-ok sa siren pagpahibalo nga oras na sa curfew. Pero sa akong tan-aw di ni molampos kung di abagan sa ginikanan ang pagpatuman sa curfew ordinance.
Timan-i kini. Pagka daghan sa nindot nga balaod nga napanday sa atong mga magbabalaod. Ang problema mao ang implimentasyon. Di kalahutay. Maayo lang sa sugod. Dako og papel ang mga ginikanan pag giya sa ilang mga anak pagpauli og sayo aron di makustodiya tungod sa curfew.
Maniid ta kung makalahutay ba ang barangay pagpatuman ning maong ordinansa. Bisan diha sa pamilya. Wa pa’y curfew ordinance diha na ning mga pagdili sa mga anak nga dugay mopauli.
Daghan ang nakasab-an, nabunalan ug ang uban nakatilaw ug santako kay nabuntagan. May nadisiplina.
Daghan sab ang nag magahi pagtuman sa ilang ginikanan. Sa kinatibuk-an ang pagpatuman sa curfew ordinance pulos ra gyud kaayohan. Kadtong motuman siguradong malayo sa peligro. Ang mosupak labi na kung wa gyu’y balidong rason magmahay ra gihapon sa kauwahian.