Bahin sa halin

Dear Noy Kulas,

Maayong adlaw kanimo ug sa tanan nga nagsunod niining imong kolum sa nabantog nga Superbalita Cebu. Ako si Noel imong suki nga nagasunod ning maong kolum.

Naa lang koy pangutana nimo kabahin sa yuta nga napalit sa akong igsuon ug sa una niyang asawa. Nakaanak silang duha ug namatay ang iyang asawa dungan sa pagpanganak sa ikaduha. Unya naminyo ang akong igsuon pag-usab, nakaanak na pud silang duha. Unya ang yuta nga napalit nila sa unang asawa gibaligya sa iyang mga anak sa unang asawa. Nangutana ang duha ka mga anak sa akong igsuon sa ikaduhang asawa nga wa ba silay katungod sa yuta nga wa man daw pahibaloa ug wa hatagi og bahin sa halin sa ilang half-brothers.

May bahin ba ang anak sa ikaduha nga asawa sa akong igsuon nga pinalit man kini sa akong igsoon ug sa una niyang asawa ? Daghang salamat. God bless.

NOEL

Noel,

Kuwang ang detalye aning imong suwat. Gawas pa, lisod ning tubagon kay legal ang imong gihisgutan. Sa ako lang nasabtan, conjugal property ang yuta nga gibaligya sa imong unang duha ka mga pag-umangkon. Sa halin, wa bahini ang laing duha nimo ka mga pag-umangkon. Unsa man, namatay na ang imong igsuon nga ilang amahan? Kay bisan tuod kon conjugal property ni, kon buhi pa either ang amahan or inahan, ang mga anak di makabuot kay ang ginikanan maoy dunay katungod. Apan matod sa Family Code, mawagtang ang conjugal partnership human sa kamatayon.

Mas maayo nga abogado ang ilang pangutan-on aron matambagan sila unsay angay buhaton. Ang pangutana man gud diha, naa ba silay bahin sa habig sa ilang amahan nga legal man usab silang mga anak? Ang abogado ray maka-explain niana kay komplikado kini nga sitwasyon sa mao nga probisyon sa Family Code, diin gihisgutan ang conjugal property.

Mao na niingon ko nga dunay kuwang sa information but bisan pa, you need to consult a lawyer.

NOY KULAS