LANCERS NAPILDI

Nasubhan og dakong kapildihan ang University of the Visayas (UV) Green Lancers batok sa Lyceum of the Philippines University (LPU) Pirates, 80-88, kagahapon sa 2018 Philippine Collegiate Champions League (PCCL) Elite 8 sa Fil Oil Flying V Arena sa San Juan, Manila.

Ang Green Lancers, kampiyon sa CESAFI, nakasikit pa sa ilang kaatbang gikan sa National Collegiate Athletic Association (NCAA) sa nagunang duha ka quarters diin igo lang naggukod ang mga Sugbuanon og tulo ka mga puntos, 35-38, sa halftime.

Sa pagpangulo ni kanhi Cesafi MVP Rey Suerte, ang Green Lancers ni coach Gary Cortes ningmugna og 6-1 nga rally aron angkunon ang labaw, 41-39.

Apan human niini, ang Pirates ni coach Topex Robinson ningpahamtang og trapping defense nga nakahatag kanila og kahigayunan sa pagpabuto og makabungog nga 17-0 run sa pagpangulo sa kaluhang sila si Jayvee ug Jaycee Marcelino alang sa 5641 nga labaw sa hinapos nga bahin sa 3rd quarter.

Ningsuway sa paggukod ang UV apan wala sila nakalahutay.

Sa kapildihan, ningtiglom ang poruhan sa Green Lancers nga makaabante sa semi-finals hilabi na kay ilang ikaharong ang gikahadlukang UAAP champion Ateneo Blue Eagles sa sunod nilang tahas karong alas 5:00 sa hapon.

Ang Blue Eagles milubong sa Naga College Foundation (NCF) Tigers sa Bicol, 84-69.

LPU (88) - J. Marcelino 16, Perez 12, Nzeusseu 9, Baltazar 9, Ayaay 8, Tancingco 8, Marcelino 7, Ibañez 6, Santos 6, Serrano 3, Caduyac 2, Cinco 2. UV (80) - Suerte 26, Segumpan 11, Soliva 11, Albina 10, Sackor 6, Gahi 6, Maestre 4, Delator 3, Napao 2, Balabag 1.