Governor's Cup volleyball andam na

Nakabaton og kahigayunan ang mga batan-on nga mahiligon sa duwang volleyball gikan sa nagkadaiyang mga siyudad ug munisipyo sa Sugbo sa pagkatukod sa usa ka dakong torneyo nga alang sa women’s under-18 age class.

Gitumbok mao ang Governor’s Cup U-18 Cebu Province Volleyball Tournament nga sugdan karong Pebrero 18 sa Mandaue City Sports and Cultural Complex.

Moabot sa 29 ka teams ang maghinampakay sa kompetisyon nga tipik sa sports grassroots program sa Cebu.

“Actually, we are all set. We’re already prepared. We are good as 100 percent for the opening,” matod ni organizer Atty. Ramil Abing, sports director sa Cebu Province Sports Commission (CPSC) sa interbyu sa Sun.Star Cebu, igsuong buhatan ning mantalaan.

“I know there will be coaches from various schools that will look forward for this volleyball tournament. We expect some of the players to be discovered,” dugang ni Abing.

Ang torneyo gibahin sa duha ka divisions, ang North ug South. Naglangkob sa North bracket 1 mao ang Mandaue City, Consolacion, Liloan, Cordova, San Francisco ug Poro. Sa North bracket 2 mao ang Danao City, Carmen, Catmon, Sogod, Asturias ug Balamban.

Nahimutang sa North bracket 3 ang Santa Fe, Medellin, Bogo, Tabogon ug Tuburan.

Sa South, ang naa sa bracket 1 mao ang Talisay City, Minglanilla, Carcar City ug Argao. Nasulod sa bracket 2 ang Dalaguete, Oslob, Santander ug Samboan samtang ang Ginatilan, Alegria, Moalboal ug Dumanjug sa bracket 3.