CLEVELAND NAG-REVAMP Unom ka mga players gipang-trade
Human nagkaguliyang sa miagi nilang mga duwa, wala mag-usik og panahon ang Cleveland Cavaliers ug mihimo dayon kini’g agresibong lakang sa tinguha nga paamagon og balik ang ilang poruhan nga makasulod sa finals sa National Basketball Association (NBA) sa ikaupat nga sunodsunod nga higayon.
Atol sa trading deadline, ang Cavaliers mi-trade sa unom nila ka mga magduduwa lakip na sila si Isaiah Thomas, Dwyane Wade ug Derrick Rose.
Ang maong lakang sa Cavaliers nakakuha og dakong atensyon lakip na ang ilang higpit nga karibal nga mao ang defending champions Golden State Warriors, nga maoy ilang gikaharong sa miaging tulo ka finals.
“It’s interesting, really interesting,” matod ni Warriors forward Draymond Green. “It’s probably obviously something that they felt was needed. I feel like they made some good moves. I don’t know, we’ll see. A lot of action. That’s a completely different team now than the team we faced the last three years. They’ve still got LeBron James. I think everything else at that point is irrelevant.”
Gisugdan sa Cavaliers ang ilang makapaukyab nga lakang pinaagi sa pag-trade kang Thomas kauban si Channing Frye ug usa ka first round pick ngadto sa Los Angeles Lakers baylo nila ni Fil-Am Jordan Clarkson ug forward Larry Nance Jr.
Si Thomas, kinsa nakuha sa Cavaliers gikan sa Boston Celtics pinaagi sa trade nga naglambigit kang Kyrie Irving, sulod pa lang sa 15 ka mga duwa nakapakita og aksyon sa bag-o niyang team tungod kay gikan kining nagpaalim sa iyang angol sa bat-ang.
Ang Cavaliers nakaugbok sab og three-tream deal sa Utah Jazz ug Sacramento Kings.
Gi-trade sa Cavaliers sila si Derrick Rose ug Jae Crowder ngadto sa Jazz baylo kang Rodney Hood.
Nakuha sab sa Cavaliers si George Hill gikan sa Kings baylo kang Iman Shumpert.
Nakadesisyon sab ang Cavaliers nga ibalik si Wade ngadto sa Miami baylo sa giprotektahang second-round pick.
Maayo kini nga kalambuan alang sa 36 anyos nga si Wade, kinsa miingon nga gusto siyang moretiro ubos sa kampo sa Heat diin nagduwa siya og 13 ka mga tuig sa wala pa siya mibalhin sa Cavaliers.
Ang lider sa Cavaliers nga si James, kinsa puwedeng mobuhi sa nahabilin sa iyang $35.6 million nga kontrata karong summer aron mahimong free agent, gilaumang kuntento ning maong lakang.
Gipasabot ni Cleveland general manager Koby Altman nga nagporma sila og puwersa nga magiyahan og balik ni James paingon sa finals.
“Jordan and Larry add athleticism, energy and length to both ends of the court for us,” pasabot ni Altman. “This trade is also a reflection of our continuing commitment to invest in our roster in ways that help us evolve and compete at the highest level now and into the future.”